نیشنل ہیلتھ مشن کا جعلی بھرتی اشتہارات کے خلاف انتباہ

سرینگر// نیشنل ہیلتھ مشن (این ایچ ایم) جموں و کشمیر نے ایک اہم وضاحتی بیان جاری کرتے ہوئے سوشل میڈیا پر گردش کرنے والے جعلی بھرتی اشتہارات سے متعلق عوام کو متنبہ کیا ہے، یہ نوٹس خصوصاً جے کے این ایچ ایم کمیونٹی ہیلتھ آفیسر (سی ایچ او) بھرتی 2024 سے متعلق گمراہ کن معلومات کے حوالے سے جاری کیا گیا۔
یہ غلط اطلاعات ایک آن لائن پورٹل www.bika.co.in کے ذریعے پھیلائی جا رہی ہیں، جس کے نتیجے میں ملازمت کے متلاشی افراد میں بے یقینی اور انتشار پیدا ہو رہا ہے۔
این ایچ ایم جے کے نے واضح کیا ہے کہ اس وقت ریاستی صحت سوسائٹی، این ایچ ایم جے کے کی جانب سے سی ایچ او یا کسی دیگر عہدے کے لیے کوئی بھرتی اشتہار جاری نہیں کیا گیا۔ لہٰذا، اس حوالے سے پھیلائی جانے والی تمام اطلاعات بے بنیاد، غلط اور گمراہ کن ہیں۔
محکمہ صحت نے عوام سے درخواست کی ہے کہ وہ ایسی جعلی اطلاعات کو نظر انداز کریں اور بھرتی سے متعلق کسی بھی غیر مصدقہ خبر یا سوشل میڈیا پر پھیلنے والے دعووں پر یقین نہ کریں۔ ملازمت کے خواہشمند افراد کو ہدایت دی گئی ہے کہ وہ صرف سرکاری ویب سائٹ [https://jknhm.jk.gov.in] سے مستند معلومات حاصل کریں۔
این ایچ ایم جے کے نے اس بات پر زور دیا ہے کہ امیدوار صرف مصدقہ ذرائع پر بھروسہ کریں تاکہ کسی بھی قسم کی دھوکہ دہی یا گمراہ کن معلومات کا شکار ہونے سے محفوظ رہ سکیں۔
کسی بھی مزید وضاحت یا معلومات کے حصول کے لیے، این ایچ ایم جے کے کے دفتر سے سرکاری ویب سائٹ یا مرکزی صحت ہیلپ لائن 104 کے ذریعے براہ راست رابطہ کیا جا سکتا ہے۔