ऐतिहासिक श्रीवर्धनमध्ये राष्ट्रवादीची तटबंदी अभेद्य...!

श्रीकांत बिरवाडकर , म्हसळा

रायगड जिल्ह्याचे नव्हे तर संपूर्ण महाराष्ट्राचे लक्ष लागून राहिलेल्या ऐतिहासिक महत्व असलेल्या दक्षिण काशी हरिहरेश्वर, सुवर्ण गणेश मंदिर दिवेआगर धार्मिक तीर्थक्षेत्र व अरबी समुद्राला जोडलेले हरिहरेश्वर बिच, दिवेआगर बिच, श्रीवर्धन बिच अशा विविधांगी निसर्गरम्य पर्यटनाची उधळण लाभलेल्या कोकणातील छत्रपती शिवाजी महाराजांच्या पद स्पर्शाने पावन झालेल्या रायगड जिल्ह्यातील म्हसळा, श्रीवर्धन, तळा, माणगाव, रोहा या पाच तालुक्यांचा समावेश असलेल्या 193 श्रीवर्धन विधानसभा मतदार संघात (अजित पवार गट) राष्ट्रवादी काँग्रेसचे प्रदेशाध्यक्ष तथा रायगडचे खासदार सुनिल तटकरे यांची कन्या तथा राज्याच्या महिला व बाल कल्याण मंत्री आदिती तटकरे यांनी ऐतिहासिक रेकॉर्ड ब्रेक विजयाला गवसणी घालून विरोधकांना भुईसपाट केले आहे. तर आदिती तटकरे यांच्या दुसर्‍यांदा विजयाने 2009 पासून राष्ट्रवादीने सलग विजयाचा चौकार मारला आहे. ऐतिहासिक महत्व असलेल्या श्रीवर्धन मध्ये खासदार सुनिल तटकरे यांनी अगदी कार्यकुशलतेने आणी विकासात्मक दूरदृष्टी ठेऊन राष्ट्रवादीची उभारलेली तटबंदी अभेद्य असल्याचे विरोधकांना छातीठोकपणे दाखवून दिले आहे. 2024 च्या विधानसभा निवडणूकीच्या मैदानात विरोधकांना चारी मुंड्या चितपट करून तटकरेंनी आपला गड शाबूत ठेवला आहे. राज्यात महायुतीचे सरकारच्या महिला व बाल विकास मंत्री आदिती तटकरे यांच्या विभागाने अंमलात आणलेल्या लाडकी बहिण योजनेच्या ब्रँड आंबेसेंडर आदिती तटकरे यांच्या विजयाने श्रीवर्धन मध्ये लाडकी बहिण हसली तर शरद पवारांची तुतारी फसली... अशा मिश्किल टोळे बाजीच्या घोषणा कार्यकर्ते देऊ लागले आहेत. आदिती तटकरे यांच्या विक्रमी मताधिक्याने विरोधकांना मतदारांनी दाखविली घरची वाट आणि विरोधक झाले भुईसपाट अशी परिस्थिती पाहायला मिळत आहे.

श्रीमंत पेशव्यांची भूमी म्हणून ओळख असलेल्या श्रीवर्धन विधानसभा मतदारसंघात विद्यमान आमदार आदिती तटकरे यांनी सलग दुसर्‍यांदा विजयाचा गुलाल उधळून विजयश्री खेचून आणून नवा इतिहास घडविला आहे. श्रीवर्धन मतदार संघाच्या इतिहासात 82 हजार पेक्षा जास्त मताधिक्याने रेकॉर्ड ब्रेक विजय संपादन करणार्‍या आमदार आदितीताई ह्या पहिल्याच मानकरी ठरल्या आहेत. आदिती तटकरे यांच्या विजयाची बातमी समजताच म्हसळा, श्रीवर्धन, तळा, माणगाव रोहा तालुक्यातील नागरिकांनी तसेच मुंबई, पुणे शहर निवासी हितचिंतक, नागरिकांनीही विजयाचा गुलाल उधळून, फटाके फोडत, एकमेकाला मिठाई भरवून आनंद साजरा केला.

महाराष्ट्र राज्याच्या विधिमंडळातील एकमेव महिला व बालविकास मंत्री आदिती तटकरे यांनी श्रीवर्धन विधानसभा मतदार संघात दणदणीत विजय मिळवला आहे. एकतर्फी विजय मिळवताना आदिती तटकरे यांनी 82798 मताधिक्य घेत प्रथमतच श्रीवर्धन मतदार संघात इतक्या मोठ्या फरकाने विजय प्राप्त करण्याचा इतिहासात नोंद झाली आहे.