बीड : दोन कारची समोरासमोर धडक; दोघे ठार, एक गंभीर

केज : केजमध्ये दोन कारची समोरासमोर धडक होऊन झालेल्या अपघातात दोघांचा जागीच मृत्यू झाला तर एकाची प्रकृती गंभीर आहे. ही घटना शुक्रवारी (दि.३१) रात्री १०.४५ च्या सुमारास केज तालुक्यातील चंदनसावरगावजवळ घडली. अपघातातील मृतांची व जखमीची ओळख अद्याप पटलेली नाही.

याबाबत अधिक माहिती अशी, शुक्रवारी रात्री १०.४५ च्या सुमारास वाहनावरील नियंत्रण सुटल्याने (एम एच-२३/ई ६८५२) आणि (एम एच-१२/एम डब्ल्यू-३५६३) दोन कारचा समोरासमोर भीषण अपघात झाला. या अपघातात दोघे जागीच ठार झाले तर एकाची प्रकृती गंभीर आहे. हा अपघात इतका भीषण होता की, आवाजाने वस्ती आणि गावातील नागरिक अपघातस्थळी मोठ्या प्रमाणात दाखल झाले. दरम्यान युसुफवडगाव पोलीस ठाण्याचे प्रभारी अधिकारी सहाय्यक पोलीस निरीक्षक मच्छिंद्रनाथ शेंडगे यांना घटनेची माहिती मिळताच त्यांच्या सुचनेनुसार बीट अंमलदार शेंडगे, हेडकॉन्स्टेबल पठाण, हेडकॉन्स्टेबल वारे व वाहन चालक हनुमंत गायकवाड हे अपघात स्थळी पोहोचले. त्यानंतर त्यांनी कारमधून मृतदेह बाहेर काढून जखमीला सरकारी रुग्णालयात दाखल केले.