मतदानासाठी 1785 मतदान कर्मचारी रवाना:पंढरपुरात 3 लाख 73 हजार 684 मतदार बजवणार हक्क, 603 पोलिस सेवेत

पंढरपूर-मंगळवेढा विधानसभा मतदार संघासाठी आज मतदान होत असून, मतदान प्रक्रिया पार पाडण्यासाठी १ हजार ७८५ मतदान अधिकारी, कर्मचारी आणि सुरक्षेसाठी ६०३ पोलिस अधिकारी व कर्मचाऱ्यांची नेमणूक करण्यात आल्याची माहिती निवडणूक निर्णय अधिकारी सचिन इथापे यांनी दिली. पंढरपूर-मंगळवेढा विधानसभा मतदारसंघातील ३५७ केंद्रांवर प्रत्येकी एक व्हीव्हीपॅट, एक कंट्रोल युनिट, दोन बॅलेट युनिट्स राहणार आहेत. ६७ ईव्हीएम मशीन राखीव राहणार आहेत. तसेच विधानसभा मतदारसंघात दिव्यांग कर्मचारी असलेले मतदान केंद्र १ आणि महिला कर्मचारी असलेले सखी मतदान केंद्र ३ तसेच ६ युवक मतदान केंद्र तयार करण्यात आले आहेत. मतदार संघातील १७८ मतदान केंद्रावर वेब कास्टिंग होणार आहे. मतदान प्रक्रिया निर्भयपणे पार पाडण्यासाठी उपविभागीय पोलिस अधिकारी डॉ. अर्जुन भोसले यांच्या मार्गदर्शनाखाली ६०३ पोलिस अधिकारी कर्मचारी यांची नियुक्ती करण्यात आली असून, यामध्ये २१ पोलिस अधिकारी तसेच ५८० ठाणे अंमलदार व होमगार्ड यांची नियुक्ती केली आहे. मतदान केंद्रांवर विविध सुविधा पुरवण्यात आल्या असून, मतदारांना बसण्यासाठी व्यवस्था, शुद्ध व मुबलक पिण्याच्या पाण्याची व्यवस्था, सावलीसाठी मंडप व्यवस्था, प्रसाधन गृह, हिरकणी कक्ष, ज्येष्ठ व दिव्यांग मतदारांसाठी रॅम्प, व्हीलचेअरची सुविधा उपलब्ध राहणारआहे. तसेच वैद्यकीय पथक, सुरक्षा रक्षकही तैनात करण्यात आले आहेत. नियुक्त अधिकारी व कर्मचाऱ्यांना मतदान केंद्रावर नेऊन सोडणे व निवडणूक मतदान प्रक्रिया पार पाडल्यानंतर परत आणतील. निवडणूक कर्तव्यावरील १९५६ जणांचे मतदान पंढरपूर विधानसभा मतदारसंघात ४४७ मतदारांनी गृहमतदान केले. दि. १८ नोव्हेंबरपर्यंत निवडणुकीच्या कामासाठी नियुक्त १९५६ अधिकारी-कर्मचाऱ्यांन ी टपाली मतदान केले आहे.