मुंबईत हजारो पोलिसांचा फौजफाटा तैनात

विधानसभेसाठी होणारे मतदान शांततेत व सुरळीत पार पाडण्यासाठी मुंबई पोलिसांनी शहरात चोख बंदोबस्त ठेवला असून आवश्यक त्या सर्व उपाययोजना हाती घेतल्या आहेत. हजारो पोलिसांना फौजफाटा शहरात ठिकठिकाणी तैनात ठेवण्यात येणार आहे.

मुंबई पोलीस दलातील पाच अपर पोलीस आयुक्त, 20 पोलीस उपआयुक्त, 83 सहाय्यक पोलीस आयुक्त यांच्यासह दोन हजारांहून अधिक पोलीस अधिकारी व 25 हजारांहून अधिक पोलीस अंमलदार तसेच तीन दंगल नियंत्रण पथके (आरसीपी) बंदोबस्त कामी तैनात करण्यात आलेले आहेत. तसेच वाहतूक विभागामार्फत स्वतंत्रपणे 144 अधिकारी व एक हजाराहून अधिक पोलीस अंमलदार बंदोबस्ताकरिता नियुक्त करण्यात आले आहेत. त्याच्या जोडीला चार हजारांहून अधिक होमगार्ड असतील. याशिवाय महत्त्वाच्या ठिकाणी व एसएसटी, एफएसटीसोबत 26 केंद्रीय सुरक्षा दले, राज्य सुरक्षा दलेदेखील तैनात राहणार आहेत. दरम्यान काही संशयास्पद हालचाली किंवा गडबड वाटल्यास तत्काळ पोलिसांशी संपर्क साधण्याचे आवाहन करण्यात आले आहे.