लागोपाठ झालेल्‍या स्फोटामुळे तुळजापूर शहरात भीतीचे वातावरण !

तुळजापूर : तुळजापूर शहरात पोलीस स्टेशनच्या डाव्या बाजूस असणाऱ्या वस्तीमध्ये अचानकपणे सायंकाळी सात वाजता लागोपाठ चार-पाच स्‍फोट झाल्याची घटना घडली आहे. तुळजापूर शहरात नगरपरिषदेच्या व पोलीस स्टेशनच्या अगदी जवळ पत्राच्या शेडमध्ये राहणाऱ्या घरामधून हे स्फोट झाल्याचे सांगण्यात आले आहे. या परिसरात लोकांची प्रचंड गर्दी झाली आहे लोकांना मदत करणे आणि उपाययोजना करण्यासाठी देखील अडचणी निर्माण झाल्‍या आहेत. परंतु सात सव्वा सात वाजता लागोपाठ चार-पाच गॅस सिलेंडरचे स्फोट झाल्याची माहिती उपलब्ध झाली आहे.

किमान चार-पाच घरामध्ये हे स्फोट झाले असेल असा पोलिसांचा प्राथमिक अंदाज आहे. ही घटना घडली तेव्हा शेजारी असणाऱ्या पोलीस स्टेशनमध्ये वरिष्ठ पोलीस अधिकाऱ्यांच्या उपस्थितीत बैठक सुरू होती. स्फोटाचे आवाज सुरू झाले तेव्हा सर्वजण बाहेर आले परंतु परिस्थिती नियंत्रणा बाहेर गेलेली होती.

मिळालेल्या माहितीनुसार सामाजिक कार्यकर्ते पंकज शहाणे यांनी या घटनास्थळी धोका पत्करून सदरील घरामध्ये घुसून काही सिलेंडर बाहेर काढल्याचे समजते आहे. घटनास्थळी अग्निशामक दल पोहचले असून आग विझवायचे काम सुरू आहे. स्फोट झाले त्या क्षणी विद्युत प्रवाह बंद पडला आणि अंधारात पसरला आहे. आजूबाजूला राहणारे लोक अंधारामध्ये आरडा ओरड करून जीव वाचवण्याचा प्रयत्न करत होते असे प्रत्यक्षदर्शींनी सांगितले.