हैदराबाद-सोलापूर राष्‍ट्रीय महामार्गावर भरधाव कारच्या धडकेत महिलेचा मृत्‍यू

नवरात्रोस्‍तव चालू असल्याने मोठ्या प्रमाणावर भाविक चिवरी महालक्ष्मी दर्शनाला येतात. नवरात्रीची पाचवी माळ असल्याने धनगरवाडी येथून चिवरी महालक्ष्मी दर्शनासाठी जात असताना कारने जोराची धडक दिल्याने राहुल गोरख दुधभाते (वय २८) हे जखमी झाले तर त्‍यांची पत्नी प्रियांका राहुल दुधभाते (वय २४) यांचे या अपघातात निधन झाले. प्रियांका व राहुल यांचा विवाह होईन केवळ दोन वर्षे झाली आहेत. या अपघातात प्रियांका यांचा मृत्यू झाल्याने हळहळ व्यक्त होत आहे.

अपघातस्थळी गाडीमध्ये मद्य असल्याच्या बाटली दिसून आल्याने चालक मद्यप्राशन करून गाडी चालवत होता का.? अशी शक्यता व्यक्त केली जात आहे. गाडीचा वेग जास्त असल्याने कारच्या धडकेत गाडी १०० फूटापर्यंत दुचाकी गाडीला फरफटत नेले. यावेळी दुचाकीवरील दोघेजणही फरफटत गेले. या राष्ट्रीय महामार्गावरती सातत्याने अपघाताचे सत्र सुरू आहे. राष्ट्रीय महामार्ग पोलीस प्रशासन यांनी मद्यप्राशन करून वाहन चालवणाऱ्या चालकांवरती कारवाई करणे गरजेचे असल्‍याची भावना नागरिकांनी व्यक्‍त केली.