Dhirendra Shastri : चेंगराचेंगरीत मृत्यू झालेल्यांना मोक्ष प्राप्ती झाली, धीरेंद्र शास्त्रींचं वादग्रस्त वक्तव्य

”जो गंगेच्या काठावर मरेल, तो मरणार नाही तर मोक्ष प्राप्त करेल”, असं वादग्रस्त वक्तव्य बागेश्वरधाम महाराज धीरेंद्र शास्त्री यांनी केलं आहे. प्रयागराजमध्ये सुरू असलेल्या महाकुंभमेळ्यात झालेल्या चेंगराचेंगरीच्या घटनेवर भाष्य करताना त्यांनी हे वादग्रस्त वक्तव्य केलं आहे.

मौनी अमावस्येला मध्यरात्री प्रयागराजच्या महाकुंभमेळ्यात झालेल्या चेंगराचेंगरीत 30 लोकांचा मृत्यू झाला. यातच सोशल मीडियावर एक व्हिडीओ व्हायरल होत आहे, ज्यामध्ये धीरेंद्र शास्त्री या घटनेवर आपले मत व्यक्त करत आहेत. व्हिडीओमध्ये ते मंचावर बसून प्रवचन करताना दिसत आहेत.

या व्हिडीओमध्ये शास्त्री यांनी चेंगराचेंगरीच्या घटनेबद्दल बोलताना म्हटलं की, “आज आम्ही काही कमेंट्स वाचत होतो, काही लोकांनी फोनही केले. आमचे काही मित्र, जे कम्युनिस्ट विचारसरणीचे आहेत, आम्हाला सांगत होते, बाबा, आता तुम्ही काय बोलाल? आम्ही बोलणार. देशात दररोज लोक मरत आहेत, काही औषधाविना मरत आहेत, काही आरोग्य व्यवस्थेशिवाय मरत आहेत. काही हृदयविकाराच्या झटक्याने मरत आहेत. या घटनेबद्दल आपण दु:ख व्यक्त करतो, पण एक गोष्ट समजून घ्या, हा महाप्रयाग आहे. मृत्यू सर्वांनाच यायचा आहे, एक दिवस सगळ्यांना जायचे आहे, हे निश्चित. गंगेच्या काठावर कोणी मरण पावला तर तो मरत नाही, त्याला मोक्ष प्राप्त होतो.”