Maharashtra Assembly Poll:'शहराचे नामांतर केलं म्हणता, मग मतदारसंघाचे नाव औरंगाबाद कसे?'

छत्रपती संभाजीनगर, पुढारी वृत्तसेवा : छत्रपती संभाजीनगर असे शहराचे नामांतर करून आम्ही शिवसेनाप्रमुख बाळासाहेब ठाकरे यांचे स्वप्न पूर्ण केले, असे पंतप्रधान नरेंद्र मोदी आज म्हणाले. परंतु संभाजीनगर कुठे आहे. नामांतर केले असेल तर मग मतदारसंघाचे नाव औरंगाबाद कसे, असा सवाल शिवसेना उबाठा पक्षाचे प्रमुख उद्धव ठाकरे यांनी उपस्थित केला.

महाविकास आघाडीच्या जिल्ह्यातील उमेदवारांच्या प्रचारार्थ गुरुवारी (दि.१७) सायंकाळी शहरातील मराठवाडा सांस्कृतिक मंडळाच्या मैदानावर उद्धव ठाकरे यांची जाहीर सभा झाली. व्यासपीठावर पक्षाचे नेते चंद्रकांत खैरे, मिलिंद नार्वेकर यांच्यासह जिल्ह्यातील मविआचे उमेदवार उपस्थित होते. उद्धव ठाकरे यांनी आपल्या २५ मिनिटांच्या भाषणात पंतप्रधान मोदी, गृहमंत्री अमित शाह, उपमुख्यमंत्री देवेद्र फडणवीस उसेच मुख्यमंत्री एकनाथ शिंदे आदीवर कठोर शब्दांत टीका केली.

विधानसभेची ही लडाई महाराष्ट्रप्रेमी आणि महाराष्ट्राला लुट्न नेणारे यांच्यातील लढाई आहे, असा घणाघात ठाकरे यांनी सुरुवातीलाच केला, पंतप्रधानांच्या आज शहरात झालेल्या सभेचा संदर्भ देऊन ते म्हणाले, आज मोदी येथे येऊन थापा मारून गेले. आम्ही शहराचे नाव छत्रपती संभाजीनगर करून बाळासाहेबांचे स्वप्न पूर्ण केले, असे ते म्हणाले. मात्र नामांतराचा ठराव आमच्या सरकारच्या शेवटच्या कॅबिनेटमध्येच आम्ही मंजूर केला होता. आज ते जर माणत असतील की त्यांनी नामांतर केले तर मला विचारायचे आहे. कुठे आहे संभाजीनगर. कारण आजही मतदारसंघांची नावे औरंगाबाद अशीच आहेत.

आज मोदी कुठे आले होते, औरंगाबाद पूर्वमध्ये आले होते की, औरंगाबाद मध्यमध्ये, मोदींचा नोकर असलेल्या निवडणूक आयोगाने ज्या तत्परतेने माझा पक्ष आणि चिन्ह चोरून दुसऱ्याला दिले, त्या तत्परतेने त्याच आयोगाने या मतदारसंघांची नावे का बदलली नाहीत, असा सवालही ठाकरे यांनी उपस्थित केला, चिकलठाणा विमानतळाचे नाव बदलून आम्ही छत्रपती संभाजीराजे विमानतळ करण्यापाचा ठरावही मंजूर केला होता. परंतु, तुम्ही ते नामांतर केले नाही. तिकडे गोव्याच्या विमानतळाचे नामांतर केले, अयोध्येचे केले, असेही उद्धव ठाकरे महणाले.