Malegaon Outer | मालेगाव बाह्य विधानसभा मतदारसंघाची जनतेची विकासाला साथ

परिवर्तन अटळच्या घोषणेला धुडकावून लावत मालेगाव बाह्य विधानसभा मतदारसंघातील जनतेने विकासाला साथ दिली. महायुती शिवसेनेचे उमेदवार पालकमंत्री दादा भुसे हे पाचव्यांदा विक्रमी मतधिक्याने विजयी झाले. भुसे यांना एक लाख 58 हजार 284 मते मिळाली असून, त्यांनी अपक्ष उमेदवार बंडूकाका बच्छाव यांचा सुमारे एक लाख सहा हजार 606 मतांनी पराभव केला.

बंडूकाका बच्छाव यांना 51 हजार 678 मते मिळाली, तर महाविकास आघाडीचे ठाकरे गटाचे उमेदवार अद्वय हिरे यांना 39 हजार 834 मत घेत तिसर्‍या स्थानावर समाधान मानावे लागले. प्रत्येक विधानसभा निवडणुकीत भुसे यांच्या मतधिक्यात वाढ झाली आहे. त्यांच्या विजयाची घोषणा होताच कार्यकर्त्यांनी फटाक्यांची आतषबाजी व गुलालाची उधळण करीत आनंदोत्सव साजरा केला. बाह्य मतदारसंघात एकूण 17 उमेदवार होते. मतदान प्रक्रिया शांततेत पार पडून 67.74 टक्के मतदान झाले होते. 2019 च्या टक्केवारीपेक्षा यावेळी आठ ते साडेआठ टक्के मतदान वाढले होते. शनिवारी (दि. 23) शासकीय वखार महामंडळाच्या गोदामात निवडणूक निर्णय अधिकारी पल्लवी निर्मळ, सहायक निवडणूक अधिकारी तहसीलदार विशाल सोनवणे यांच्या मार्गदर्शनाखाली मतमोजणी पार पडली. यावेळी निवडणूक निरीक्षक राहुलकुमार हे उपस्थित होते. प्रारंभी टपाली मतमोजणी करण्यात आली. त्यानंतर 14 टेबलांवर मतदान यंत्रांची मतमोजणी करण्यात आली. पहिल्या फेरीपासूनच भुसे यांची आघाडी वाढत होती. ती 26 व्या फेरीअखेर कायम ठेवत विजयावर शिक्कामोर्तब झाले व भुसे यांनी मतदान केंद्रात विजयाचे प्रमाणपत्र स्वीकारले.