Nashik | नितीन पवारांनी राखला कळवण-सुरगाण्याचा गड

लोकसभा निवडणूकीत महाविकास आघाडीला कौल देणाऱ्या कळवण-सुरगाणावासीयांनी यंदाच्या निवडणूकीत महायुतीला खंबीर साथ दिली आहे. अत्यंत चुरशीच्या ठरलेल्या या लढतीत नितीन पवार यांनी पुन्हा एकदा बाजी मारली. कळवण-सुरगाणा मतदारसंघाची मतमोजणी शनिवारी (दि. २३) कोल्हापूर फाटा येथील प्रशासकीय कार्यालयात पार पडली. सकाळी ८ पासून प्रारंभ झालेल्या मतमोजणीमध्ये पहिल्या फेरीपासून जे. पी. गावित यांनी आघाडी घेतली. मतमोजणीच्या सतराव्या फेरीपर्यंत ही आघाडी कायम राखल्याने माकपासह महाविकास आघाडीच्या गोटात आनंदोत्सव साजरा करण्यात आला. पण अठराव्या फेरीपासून पवारांनी गावित यांची आघाडी मोडीत काढायला सुरवात केली. पवारांनी ही आघाडी शेवटपर्यंत कायम राखली.

विधानसभेच्या लढाईत नितीन पवार हे पाच वर्षात मतदारसंघामध्ये केलेली विकासाची कामे घेऊन जनतेसमोर गेले. त्यांच्या या विकासाला कळवणवासीयांसोबत सुरगाण्याच्या जनतेने साथ दिल्याने माकपला पराभवाची चव चाखावी लागली. नितीन पवारांच्या विजयाची घोषणा होताच समर्थकांनी एकच जल्लोष साजरा केला.

निवडणूकीत विरोधकांनी विकासावर बोलणे अपेक्षित असताना टोकाचे वैयक्तिक आरोप व टीका केली. पण मतदारसंघातील जनतेने विकासकामांना पसंती देत मतदानातून विरोधकांना चोख उत्तर दिले. कळवण-सुरगाणा तालुक्यातील जनतेने विकासाला दिलेला हा कौल असून मी जनतेचा विश्वास सार्थ ठरविण्यासाठी कायम प्रयत्नशील राहील.

नितीन पवार, आमदार, कळवण-सुरगाणा