NMMS Exam | एनएमएमएस शिष्यवृत्ती परीक्षेची तारीख जाहीर

वेळापत्रकानुसार विद्यार्थ्यांना ५ ऑक्टोबर ते ४ नोव्हेंबर दरम्यान नियमित शुल्कासह ५ ते ९ नोव्हेंबरदरम्यान विलंब शुल्कासह आणि १० ते १४ नोव्हेंबरदरम्यान अतिविलंब शुल्कासह आवेदनपत्रे भरता येणार असल्याचे परीक्षा परीषदेने जाहीर केले आहे. आर्थिक दुर्बल घटकातील विद्यार्थ्याला पुढील शिक्षणासाठी संबंधित योजनेतून वर्षाला १२ हजार रूपयांची शिष्यवृत्ती दिली जाते. परीक्षेसाठी इयत्ता आठवीमध्ये शिक्षण घेत असलेल्या विद्यार्थ्यांचे व त्याच्या पालकांचे वार्षिक उत्पन्न साडेतीन लाखांपेक्षा कमी असणारे अर्जास पात्र ठरतात. शिष्यवृत्तीसाठी निवड लेखी परीक्षेमधून करण्यात येते. २२ डिसेंबरला राज्यभरात ही परीक्षा होणार आहे. बौद्धिक क्षमता चाचणी व शालेय क्षमता चाचणी अशा दोन विषयांच्या पेपरचा समावेश असतो. पहिल्या पेपरमध्ये मानसशास्त्रीय चाचणीमध्ये कार्यकारणभाव, विश्लेषण, संकलन आदी संकल्पनांवर तर दुसरा पेपर हा अभ्यासक्रमावर आधारित असेल. त्यामध्ये सामान्य विज्ञान, समाजशास्त्र, गणित, भौतिकशास्त्र, रसायनशास्त्र, जीवशास्त्र, भूगोल, इतिहासचा समावेश आहे. प्रत्येक पेपर हा ९० गुणांसाठीचा असतो. ज्यासाठी पात्रता गुण ४० टक्के मिळणे आवश्यक असते. एससी, एसटी व दिव्यांग विद्यार्थ्यांसाठी ३२ टक्के असा निकष आहे. विद्यार्थ्यांना आठ माध्यमातून ही परीक्षा देता येतात. संबंधित परीक्षेचा निकाल फेब्रुवारी २०२५ मध्ये जाहीर करण्यात येणार असल्याचे परीषदेकडून स्पष्ट करण्यात आले आहे.