SAT20: సౌతాఫ్రికా టీ20 లీగ్ లో సన్‌రైజర్స్ మోత! ముచ్చటగా మూడోసారి ఫైనల్‌లోకి దూసుకెళ్లిన కావ్య టీమ్

3 hours ago 2

సౌతాఫ్రికా టీ20 లీగ్ (SAT20) 2025లో టైటిల్ రేసులో ముందుకు సాగుతున్న డిఫెండింగ్ ఛాంపియన్ సన్‌రైజర్స్ ఈస్ట్రన్ కేప్ మరోసారి తన ఆధిపత్యాన్ని ప్రదర్శించింది. తాజా క్వాలిఫయర్-2 మ్యాచ్‌లో పార్ల్ రాయల్స్‌ను 8 వికెట్ల తేడాతో ఓడించి వరుసగా మూడోసారి ఫైనల్ బెర్త్‌ను ఖరారు చేసుకుంది. ఈ జట్టు ఐపీఎల్ ఫ్రాంఛైజీ సన్‌రైజర్స్ హైదరాబాద్ యాజమాన్యానికి చెందినదే కావడం విశేషం.

పార్ల్ రాయల్స్ నిర్దేశించిన 176 పరుగుల లక్ష్యాన్ని సన్‌రైజర్స్ కేవలం 19.2 ఓవర్లలోనే ఛేదించింది. ఓపెనర్ టోనీ డి జోర్జీ 49 బంతుల్లో 78 పరుగులు చేసి మెరుగైన ఇన్నింగ్స్ ఆడాడు. అతనికి జోర్డాన్ హెర్మాన్ అద్భుతమైన సహకారం అందించాడు. 48 బంతుల్లో 69 పరుగులు చేసిన అతను జట్టును గెలిపించడంలో కీలకపాత్ర పోషించాడు. మరోవైపు, పార్ల్ రాయల్స్ బౌలర్లలో మఫాక, దునిత్ ఒక్కో వికెట్ తీసినా, సన్‌రైజర్స్ బ్యాటింగ్ దూకుడు ముందు వాళ్లు ప్రభావం చూపలేకపోయారు.

ముందు బ్యాటింగ్‌కు దిగిన పార్ల్ రాయల్స్ 20 ఓవర్లలో 175/4 స్కోరు చేసింది. రూబిన్ హెర్మాన్ 81 అజేయ పరుగులు చేస్తూ నిలకడైన ఇన్నింగ్స్ ఆడాడు. ఓపెనర్ ప్రిటోరియస్ 59 పరుగులతో జట్టును గట్టెక్కించాడు. సన్‌రైజర్స్ బౌలింగ్‌లో మార్కో జాన్సెన్, మార్‌క్రమ్, బార్టమన్ ఒక్కో వికెట్ తీశారు.

సన్‌రైజర్స్ ఫైనల్ పోరులో ముంబై ఇండియన్స్ (MI) కేప్ టౌన్‌తో తలపడనుంది. ఇప్పటికే గత రెండు సీజన్లలో టైటిల్ గెలిచిన ఈస్ట్రన్ కేప్ జట్టు మూడోసారి కప్పును ముద్దాడాలని పట్టుదలగా ఉంది. జట్టులో ఐడెన్ మార్క్రమ్ నాయకత్వం, కోచ్ అడ్రియన్ బిరెల్ మార్గదర్శకత్వం జట్టును విజయపథంలో నిలిపాయి.

జోర్జీ అద్భుత ప్రదర్శన:

టోనీ డి జోర్జీ ఈ మ్యాచ్‌లో తన బ్యాటింగ్ సామర్థ్యాన్ని నిరూపించుకున్నాడు. సెంచూరియన్‌లో జరిగిన ఈ పోరులో అతను 49 బంతుల్లో 11 బౌండరీలు, 2 సిక్సర్లతో 78 పరుగులు చేసి మ్యాచ్ విన్నింగ్ ఇన్నింగ్స్ ఆడాడు. “నా పై నమ్మకాన్ని ఉంచిన ఐడెన్, ఎడ్డీకి నేను కృతజ్ఞుడను. మేము T20లో ఎక్కువగా ఆడకపోయినా, మా బలాన్ని నిరూపించుకోవడమే లక్ష్యం” అని అతను వ్యాఖ్యానించాడు.

ఓటమితో టోర్నమెంట్ నుంచి నిష్క్రమించిన పార్ల్ రాయల్స్ కెప్టెన్ డేవిడ్ మిల్లర్ “T20 క్రికెట్‌లో చిన్న మార్జిన్‌లు కూడా పెద్ద తేడా చేస్తాయి. మేము కొన్ని అవకాశాలను కోల్పోయాం, కానీ మా జట్టు పోరాటపటిమ చూపించింది” అని అన్నారు. అలాగే, వచ్చే సీజన్ కోసం అనుభవజ్ఞులైన ఆటగాళ్లను జట్టులోకి తీసుకురావాలని భావిస్తున్నట్లు పేర్కొన్నాడు.

సన్‌రైజర్స్ వరుసగా మూడోసారి టైటిల్‌ను గెలవాలని ఉవ్విళ్లూరుతోంది. MI కేప్ టౌన్ బలమైన జట్టే అయినా, సన్‌రైజర్స్ గెలుపుపై పూర్తి నమ్మకం పెట్టుకుంది. “మా జట్టులోని ప్రతి ఒక్కరూ గరిష్ట స్థాయికి చేరుకున్నారు. ఫైనల్ పోరు కచ్చితంగా ఉత్కంఠభరితంగా ఉంటుంది” అని డి జోర్జీ పేర్కొన్నాడు. ఫిబ్రవరి 8న జరగనున్న ఈ తుది పోరుకు క్రికెట్ అభిమానులు ఆసక్తిగా ఎదురుచూస్తున్నారు.

మరిన్ని క్రీడా వార్తల కోసం ఇక్కడ క్లిక్ చేయండి..

*** Disclaimer: This Article is auto-aggregated by a Rss Api Program and has not been created or edited by Nandigram Times

(Note: This is an unedited and auto-generated story from Syndicated News Rss Api. News.nandigramtimes.com Staff may not have modified or edited the content body.

Please visit the Source Website that deserves the credit and responsibility for creating this content.)

Watch Live | Source Article