اسمبلی انتخابی سفر کا آخری مرحلہ|| ووٹ شماری آج

عظمیٰ نیوز سروس

سرینگر+جموں //متعدد سطحی سیکورٹی انتظامات کے درمیان آج یعنی منگل کو جموں و کشمیر میں اسمبلی کی 90 نشستوں کے لیے ووٹوں کی گنتی کے مرحلے کیلئے سبھی تیاریاں مکمل ہیں اور اسمبلی انتخابی سفر کا آخری مرحلہ آج سخت سیکورٹی بندو بست میں مکمل ہونے جارہا ہے۔حکام نے بتایا کہ سرینگر میں، الیکٹرانک ووٹنگ مشینوں (ای وی ایم)کا استعمال کرتے ہوئے گنتی ڈل جھیل کے کنارے سینٹور میں واقع شیرکشمیر انٹرنیشنل کنونشن سینٹر میں کی جائے گی۔عہدیداروں نے بتایا کہ یونین ٹیریٹری کے 20 اضلاع کے تمام ڈپٹی کمشنروں نے ووٹوں کی گنتی کے مراکز پر سہولیات فراہم کی ہیں۔چیف الیکٹورل آفیسر پانڈورنگ کے پولے نے شفافیت پر زور دیتے ہوئے وعدہ کیا کہ اس بات کو یقینی بنانے کی کوشش کی جائے گی کہ میڈیا اور عوام دونوں انتخابی نتائج کے سامنے آتے ہی ان سے باخبر رہیں۔انہوں نے عہدیداروں کو ہدایت دی کہ وہ اس بات کو یقینی بنائیں کہ الیکشن کمیشن آف انڈیا کے رہنما خطوط کے مطابق تمام ضروری اقدامات کو سختی سے لاگو کیا جائے۔اسی طرح کے انتظامات جموں خطے میں تمام اضلاع کے گنتی مراکز پر کیے گئے ہیں۔ تمام مرکزی دھارے کی جماعتوں نے اپنے گنتی ایجنٹوں کو نامزد کیا ہے۔

انتظامیہ پیر کے روز تمام 20ضلعی ہیڈکوارٹرز میں مقررہ مراکز پر سیکورٹی سمیت انتظامات کو حتمی شکل دینے میں مصروف رہی۔الیکشن کمیشن کے حکام کے مطابق، گنتی کے تمام مراکز پر تین سطحی حفاظتی انتظامات کیے گئے ہیں تاکہ اس بات کو یقینی بنایا جا سکے کہ پرامن طور پر سب کچھ ٹھیک ہو جائے۔وادی کشمیر اور جموں خطہ کے تمام مراکز میں سیکورٹی اہلکاروں نے پوزیشن سنبھال لی تھی اور پہرہ دے رہے ہیں۔چیف الیکٹورل آفیسر پانڈورنگ کے پولے نے کہا کہ ووٹوں کی گنتی صبح 8بجے شروع ہوگی اور 90حلقوںکے لیے 28گنتی مراکز قائم کیے گئے ہیں۔پولےنے کہا کہ ہر گنتی مرکز کے 100 میٹر کے دائرے میں کافی چوکیاں قائم کی گئی ہیں اور تمام اسٹرانگ رومز میں سی سی ٹی وی کیمرے نصب کیے گئے ہیں جہاں تمام سرگرمیوں پر کڑی نظر رکھنے کے لیے ای وی ایم محفوظ ہیں۔ سی ای او نے مزید کہا کہ “غیر مجاز افراد کے ان علاقوں میں داخلے پر پابندی ہوگی اور مرکزی دروازے پر اور گنتی کے مراکز کے پورے احاطے میں سی سی ٹی وی کیمرے نصب کیے گئے ہیں تاکہ جامع نگرانی کو یقینی بنایا جا سکے”۔پولے نے بتایا کہ گنتی صبح 8بجے شروع ہوگی اور سب سے پہلے پوسٹل بیلٹ کی گنتی کی جائے گی، اس کے بعد 30منٹ کے بعد الیکٹرانک ووٹنگ مشینوںکی گنتی ہوگی، انہوں نے مزید کہا کہ گنتی کے ہر دور کی درست معلومات کو اپ لوڈ کیا جائے گا۔سی ای او نے بتایا کہ گنتی کے دن امیدواروں، ان کے مجاز نمائندوں، ریٹرننگ آفیسر ز / اسسٹنٹ ریٹرننگ آفیسرز اور ای سی آئی کے مبصرین کی موجودگی میں اسٹرانگ روم کھولے جائیں گے اور پورے عمل کی ویڈیو گرافی کی جائے گی۔ انہوں نے مزید کہا کہ گنتی مراکز کے اندر موبائل فون لے جانے کی اجازت نہیں ہوگی۔پول نے مزید کہا کہ کپواڑہ، سانبہ، جموں، ادھم پور اور ریاسی اضلاع کے لیے دو دو گنتی مراکز قائم کیے گئے ہیں، تین گنتی مراکز مہاجرین کے لیے قائم کیے گئے ہیں جبکہ باقی اضلاع کے لیے ایک ایک گنتی مرکز قائم کیا گیا ہے، جہاں گنتی ہو رہی ہے۔