چالان اورضبطی میں اضافے کے باوجود سڑک حادثات میں کوئی کمی نہیں

عظمیٰ نیوز زسروس

سرینگر//کشمیر کے ریجنل ٹرانسپورٹ آفیسر)آر ٹی او( سید شاہنواز بخاری نے بدھ کو کہا کہ انفورسمنٹ ٹیموں کی طرف سے چالان اور ضبطی میں اضافے کے باوجود وادی کشمیر میں سڑک حادثات میں کوئی کمی نہیں آئی ہے۔ انہوں نے بڑے پیمانے پر معاشرے پر زور دیا کہ وہ آگے آئیں اور لوگوں کو سمجھدار ڈرائیونگ کے بارے میں آگاہ کرنے میں اپنا اجتماعی کردار ادا کریں۔آر ٹی او کشمیر نے کہا کہ ہمارا قانون نافذ کرنے والا عملہ ہمیشہ مستعد رہتا ہے جو کہ ایک عام بات ہے۔ “یہ انتہائی بدقسمتی کی بات ہے کہ سرینگر کے ٹینگ پورہ بائی پاس پر ایک حالیہ المناک سڑک حادثے میں ہم نے دو نوجوان لڑکوں کو کھو دیا۔ جب ہم ایسے واقعات دیکھتے ہیں تو ہم ان سے سنجیدگی سے نمٹتے ہیں۔ ہماری انفورسمنٹ ٹیمیں روزانہ کی بنیاد پر الرٹ رہتی ہیں۔ لیکن اس کے ساتھ ساتھ اس بات کی بھی ضرورت ہے کہ معاشرے کو اپنے کردار اور ذمہ داری کا احساس کرنا چاہیے۔ لاپرواہی سے ڈرائیونگ کی اجازت نہیں دی جانی چاہئے، اور سبھی کی طرف سے اس کی مذمت کی جانی چاہئے، “۔انہوں نے بڑے پیمانے پر والدین اور معاشرے پر زور دیا کہ وہ کم عمر بچوں کی لاپرواہی سے ڈرائیونگ کو روکنے میں اپنا کردار ادا کریں۔

انہوں نے کہا کہ جب تک والدین، رشتہ دار، دوست احباب، پڑوسی اور معاشرہ مجموعی طور پر اس میں اپنا کردار ادا نہیں کریں گے تب تک ہم مثالی صورتحال میں واپس نہیں آسکتے، ورنہ ایسے حادثات ہوتے رہیں گے۔انہوں نے مذہبی رہنمائوں اور نچلی سطح کے سماجی کارکنوں سے اپیل کی کہ وہ لوگوں کو آگاہ کریں اور انہیں قائل کریں کہ وہ کم عمر کی ڈرائیونگ کو روکنے میں اپنا کردار ادا کریں۔انہوں نے کہا “ہم اپنے پاس دستیاب اقدامات کے ذریعے اپنی سطح پر کوشش کر رہے ہیں، لیکن پھر بھی ایک حد ہے، ہم کتنے دو پہیہ اور چار پہیہ گاڑیاں ضبط کریں گے، اس سے آگے سوچنے کی ضرورت ہے، معاشرے کا اس میں ایک کردار ہے، کیونکہ بڑھتے ہوئے سڑک حادثات کو ختم کرنے میں اس کا بڑا حصہ ہے‘‘۔انہوں نے کہا کہ ہمارے دفتر نے تمام ضلعی ٹیموں کو انفورسمنٹ مہم کو تیز کرنے اور خلاف ورزی کرنے والوں کے خلاف سخت کارروائی کرنے کی ہدایت کی ہے۔آر ٹی او کشمیر نے کہا”گزشتہ چند مہینوں میں ہماری انفورسمنٹ ٹیموں نے صرف سرینگر ضلع میں 1500-1600 گاڑیوں کے چالان کئے اور 37 لاکھ روپے کا جرمانہ وصول کیا ۔ اس کے علاوہ پچھلے کچھ مہینوں میں پورے کشمیر میں ٹریفک کی خلاف ورزیوں کے خلاف 1.75 کروڑ روپے وصول کیے گئے ہیں، “۔انہوں نے مزید کہا کہ اگرچہ ہر سال جرمانے کی رقم میں اضافہ ہو رہا ہے لیکن سڑک حادثات میں کوئی کمی نہیں آئی۔ انہوں نے مزید کہا کہ ضرورت اس بات کی ہے کہ معاشرہ اسے سنجیدگی سے لے اور لوگوں کو سمجھدار ڈرائیونگ کے بارے میں آگاہ کرے۔