ہندواڑہ میں پولیس اور این آئی اے کی مشترکہ کاروائی، انتہائی مطلوب مجرم گرفتار

File Photo

کپواڑہ// جموں و کشمیر پولیس اور نیشنل انویسٹی گیشن ایجنسی (این آئی اے) نے ہندواڑہ میں مشترکہ کاروائی کے دوران 5 لاکھ روپے انعام یافتہ مجرم منیر احمد بانڈے کو گرفتار کر لیا۔
پولیس کے جاری کردہ بیان کے مطابق، منیر احمد بانڈے، جو ہندواڑہ کے بانڈے محلہ کا رہائشی ہے، جون 2020 سے مفرور تھا اور این ڈی پی ایس ایکٹ، یو اے پی اے اور انڈین پینل کوڈ کے تحت درج مقدمات میں مطلوب تھا۔
بیان کے مطابق، منیر احمد بانڈے ایک بڑے منشیات سمگلنگ کیس میں ملوث تھا، جو غیر قانونی سرگرمیوں کی فنڈنگ کے لیے استعمال کیا جا رہا تھا۔
پولیس اور دیگر سیکیورٹی ایجنسیوں کے لیے بانڈے کی گرفتاری منظم جرائم اور نارکو ٹیررزم کے خلاف ایک بڑی کامیابی سمجھی جا رہی ہے۔
پولیس کے مطابق، یہ کارروائی مجرموں کو انصاف کے کٹہرے میں لانے اور غیر قانونی سرگرمیوں میں ملوث نیٹ ورکس کو ختم کرنے کے عزم کی عکاسی کرتی ہے۔
کیس کی مزید تحقیقات جاری ہیں۔