अंजनगाव सुर्जी वनपरिक्षेत्रात आढळला मृत वाघ

अमरावती : चिखलदरा तालुक्यातील अंजनगाव सुर्जी वनपरिक्षेत्रात वाघ मृत अवस्थेत आढळून आला आहे. या वाघाची शिकार झाल्याची शंका व्यक्त केली जात आहे. वनविभागाला घटनास्थळी वाघाचे तीन पंजे नसल्याचे तसेच नखे नसलेला एक पंजा आढळून आला.ही घटना मंगळवारी (दि.26) रात्री उघडकीस आली. मंगळवारी रात्री अंजनगाव वनपरिक्षेत्रात गस्तीवर असलेल्या अधिकारी आणि कर्मचाऱ्यांना पांढर खडका परिसरात हा वाघ आढळून आला.

या घटनेची माहिती तत्काळ वरिष्ठांना देण्यात आली. घटनास्थळी वनविभागाचे अधिकारी पोहोचले. सूर्यास्त झाल्याने त्या ठिकाणी संरक्षणाकरिता कर्मचाऱ्यांना पाळत ठेवण्याचे निर्देश देण्यात आले. 27 नोव्हेंबर रोजी सकाळी मार्गदर्शक सूचनेनुसार शवविच्छेदन करण्यात आले. मृत वाघाचे नमुने न्यायवैद्यक प्रयोगशाळेत पाठविण्यात येणार असून शवविच्छेदन अहवाल आल्यानंतरच त्याच्या मृत्यूचे खरे कारण समजणार आहे. दरम्यान वाघाचा मृत्यू हा संशयास्पद असल्यामुळे या प्रकरणाची सखोल चौकशी करण्यासाठी समिती गठीत करण्यात आली आहे. घटनास्थळाचे एक किलोमीटर परिघामध्ये बारकाईने निरीक्षण व पाहणी केली जात आहे. मेळघाट व्याघ्र प्रकल्प अंतर्गत येणारा क्राईम सेल व स्थानिक पोलीस विभागाच्या समन्वयाने पुढील तपास सुरू आहे.