अतिक्रमण हटवण्यासाठी ग्रामस्थांचे टाकीवर आंदोलन:आंचलगावचे ग्रामस्थ, युवक झाले आक्रमक

वैजापूर तालुक्यातील आंचलगाव येथे क्रीडांगण व त्यावर असणारे अतिक्रमण हटवण्यासाठी ग्रामस्थांनी गुरुवारी आंदोलन सुरू केले. एक वर्षापासून शासनाकडे अतिक्रमण हटवण्याची मागणी केली जात होती, परंतु शासनाकडून या प्रकरणावर कोणतीही कार्यवाही होत नसल्यामुळे ग्रामस्थांनी जीर्ण पाण्याच्या टाकीवर आंदोलन सुरू केले आहे. आंदोलनाची मुख्य मागणी म्हणजे शाळेच्या क्रीडांगणावर असलेले अतिक्रमण त्वरित हटवण्यात यावे. आंचलगाव ग्रामस्थ व शालेय व्यवस्थापन समिती १ वर्षापासून शासनाला अनेक वेळा विनवणी करुनही ठोस कारवाई केली गेली नाही. या आंदोलनात शाळेतील शिक्षक, ग्रामस्थ व शालेय व्यवस्थापन समितीतील सदस्य सहभागी झाले आहेत. यात प्रभाकर केशव कोकाटे (अध्यक्ष), पांडुरंग मारुती वाघचौरे (उपाध्यक्ष), बाळू दादा सुराशे, संदीप दगडू कंकाळ, गणेश रायभान बिडाईत, राजू अंबर निकम, प्रकाश अण्णा ननावरे आदींसह अनेकांचा समावेश आहे. ग्रामस्थांनी शोलेस्टाईल आंदोलन केले. छाया : शांताराम मगर.