गजानन महाराज मठात 1 लाख 19 हजार भाविकांना महाप्रसाद:70 दिंड्यांना प्रत्येकी 10 टाळ जोड, वीणा, पखवाज आदी वाद्य साहित्य भेट

कार्तिक यात्रेनिमित्त येथील श्री संत गजानन महाराज मठामध्ये दशमी, एकादशी व बारस या कालावधीत १ लाख १९ हजारावर भक्तांना श्री महाप्रसाद वितरीत करण्यात आला. तसेच यात्रेनिमित्त पंढरपूर शाखेत आलेल्या ७४ दिंड्यांपैकी नियमाची पूर्तता केलेल्या ७० भजनी दिंड्यांना १० टाळजोड, १ विणा, १ मृदंग, १ हातोडी असे भजनी साहित्य व श्री ज्ञानेश्वरी, श्री तुकाराम महाराज गाथा व श्री एकनाथी भागवत या संत वाङ्मयाचे वितरण करण्यात आले असल्याची माहिती संत गजानन महाराज संस्थानच्यावतीने देण्यात आली. त्याच बरोबर कार्तिकी यात्रेत सहभागी झालेल्या वारकऱ्यांसाठी धर्मार्थ येलोपॅथीक रूग्णालयाचे माध्यमातून ६ हजार भाविकांनी आरोग्य सेवेचा लाभ घेतला आहे. आतापर्यंत श्री संस्थेव्दारा शेगांव, श्री क्षेत्र पंढरपूर, श्री क्षेत्र आळंदी व श्री क्षेत्र त्र्यंबकेश्वर या तिर्थक्षेत्री महाराष्ट्रासह गोवा, कर्नाटक, गुजरात, मध्यप्रदेश, आंध्रप्रदेश, उत्तरप्रदेश, उत्तराखंड, तेलंगणा अशा ९ राज्यामधील ७७ जिल्ह्यातून आलेल्या २० हजार १७७ गावांना भजनी साहित्य व श्री ज्ञानेश्वरी, श्री तुकाराम गाथा, श्री एकनाथी भागवत अशा संत वाङ्मयाचे वितरण करण्यात आले आहे असेही संस्थान च्या वतीने सांगण्यात आले.