जम्मू-काश्मिरमधील 103 अनाथ मुलींना स्वावलंबनाचे धडे:बॉर्डरलेस वर्ल्ड फाऊंडेशनच्या माध्यमातून महाराष्ट्रातील 17 महिलांचा उपक्रम

काश्मीरमधील संघर्षामुळे अनाथ झालेल्या मुलींच्या पुनर्वसनासाठी कार्य करणाऱ्या बॉर्डरलेस वर्ल्ड फाउंडेशनच्या माध्यमातून महाराष्ट्रातील १७ महिलांनी या मुलींना शिक्षण व स्वावलंबनाचे धडे दिले. १० ते २० जानेवारीदरम्यान झालेल्या या उपक्रमात विविध कौशल्ये शिकवून मुलींना आत्मनिर्भर करण्याचा प्रयत्न करण्यात आला. आधिक कदम या युवकाने २००२ मध्ये बॉर्डरलेस वर्ल्ड फाउंडेशनची स्थापना केली. आज या संस्थेचे ५ होस्टेल्स कार्यरत आहेत. त्यात काश्मीरमध्ये श्रीनगर, बिरवा, कुपवाडा, अनंतनाग येथे, तर एक जम्मूमध्ये आहे. येथे राहणाऱ्या मुलींना शिक्षण, संस्कार, आरोग्यसेवा आणि आर्थिक स्वावलंबनासाठी प्रशिक्षण दिले जाते. पुणे, ठाणे, डोंबिवली, वाशी, सातारा, अहिल्यानगर येथील १७ महिलांनी एकत्र येऊन काश्मीर आणि जम्मूमधील १०३ मुलींना स्वावलंबन आणि रोजगारक्षम कौशल्ये शिकवण्याचा निर्णय घेतला. वर्षभर कुटुंबाची, मुलांची, नातेवाईकांची जबाबदारी घेतच असतो, त्यातून वेळ काढून या मुलींचे किमान सात दिवसासाठी पालकत्व घेण्याचा विचार केला. त्यात १७ पैकी बहुतेक महिला व्यवसाय, नोकरी करतात. काही वेगवेगळ्या कलांमध्ये निपुण आहेत. अशा गोष्टी मुलींना शिकवल्यास भविष्यात त्या वस्तूंची विक्री करून त्या स्वतःच्या पायावर उभ्या राहू शकतात. मुली या उपक्रमात अतिशय आनंदाने सहभागी झाल्या. त्यांना नवीन कौशल्ये शिकताना आत्मविश्वास मिळाला. नगरमधील जयश्री सोमाणी, अनुराधा बिहाणी व दीपिका भारदे यांनी मोत्याच्या वस्तू, सूर्यनमस्कार, लिपन आर्ट शिकविले. नीता म्हस्के व गीता देशमुख यांनी इन्स्टंट रांगोळी, पेपर क्विलिंग व महाराष्ट्रीयन पदार्थ शिकवले. पद्मजा धोपावकर यांनी सेल्फ डिफेन्स, इन्स्टंट रांगोळी, मोत्याचे दागिने शिकविले. डॉ. अंशू मुळे यांनी माईंड फुलनेस मेडिटेशन, बौद्धिक सत्र व पेपर क्विलिंग शिकविले. बॉर्डरलेस वर्ल्ड फाउंडेशनने अतिशय उत्कृष्ट व्यवस्थापन केले. जम्मूमधील कडाक्याच्या थंडीतही महिलांना कोणतीही अडचण आली नाही. या उपक्रमानंतर दरवर्षी ७ दिवस समाजसेवेसाठी द्यायचे, असा निर्णय या महिलांनी घेतला आहे. महाराष्ट्रातील नागरिकांनीही अनाथ, निराधार आणि वंचित मुलांसाठी योगदान देण्याचे आवाहन त्यांनी केले. मुलींना स्वसंरक्षणाबरोबर रोजगाराचेही प्रशिक्षण स्वयंसेविका महिलांनी सकाळी ६.३० ते रात्री ७.३० या वेळेत काम करून मुलींना सेल्फ डिफेन्स आणि योगासने, पेपर क्विलिंग, मोत्याचे दागिने आणि लिप्पन आर्ट, महाराष्ट्रीयन पदार्थांची ओळख, माईंड फुलनेस मेडिटेशन आणि बौद्धिक सत्रे, चारचाकी चालवण्याचे प्राथमिक प्रशिक्षण, वॅक्स पावडर, साबण, परफ्यूम आणि फेशियल बॉम्ब तयार करणे, पुष्पौषधी आणि आयुर्वेदातील १२ क्षारांचा वापर आदींचे प्रशिक्षण दिले.