जिवंत मतदाराला ठरवलं मृत; मुंबादेवी मतदारसंघातील घटना

जिवंत मतदाराला मृत घोषित केल्याची घटना मुंबादेवी मतदारसंघातील एका मतदान केंद्रावर घडली. गोव्याहून खास मतदानासाठी आलेले अँथोनी ब्रिगेन्झा यांच्या नावापुढे मृत असल्याचे दर्शविण्यात आले होते. अखेर बराच काळ वादावादीनंतर त्यांना मतदान करण्याची परवानगी मिळाली.

मुंबई सेंट्रलच्या बीआयटी चाळीत राहणारे अँथोनी ब्रिगेन्झा हे मतदान केंद्रावर गेले असता तेथील कर्मचाऱयांनी त्यांना मतदान करण्यास मनाई केली. मतदार यादीनुसार त्यांना मृत घोषित करण्यात आले होते हे ऐकून ब्रिगेन्झा यांना प्रचंड धक्काच बसला. लोकसभा निवडणुकीच्या वेळी त्यांनी मुंबईत येऊन मतदान केले होते, मात्र यावेळी त्यांना धक्काच बसला.

सामाजिक कार्यकर्ते संतोष दौंडकर यांनी अँथोनी ब्रिगेन्झा यांना मदत केली. निवडणूक ओळखपत्र आणि आधारकार्ड दाखवल्यानंतर निवडणूक अधिकाऱयांची खात्री पटली. त्यांनी अँथोनी ब्रिगेन्झा यांच्याकडून डिक्लेरेशन फॉर्म भरून घेतला. त्यानंतर ब्रिगेन्झा यांना मतदान करू दिले. डिक्लेरेशन फॉर्म भरून झाल्यानंतर त्याची छायांकित प्रत देण्यात यावी, अशीही मागणी ब्रिगेन्झा यांनी केली होती. निवडणूक कार्यालयाच्या रेकॉर्डवरील मृत्यूची नोंद काढून टाकण्यासाठी ही प्रत त्यांनी मागितली. त्यावेळी अधिकाऱयांनी त्यालाही मनाई केली, मात्र अखेर त्यांना ही प्रत देण्यात आली.