पहिल्यादाच मतदान करण्यासाठी तरुणीने थेट लंडनहून गाठली रत्नागिरी

लंडनहून येऊन एका तरुणीने रत्नागिरीत मतदान केले. रत्नागिरी विधानसभा मतदार संघातील देसाई हायस्कूल येथील मतदान केंद्रात तीने मतदानाचा हक्क बजावला. सानिका परशुराम निवेंडकर असे त्या तरुणीचे नाव असून तिने हे तिचे पहिले मतदान होते.

सानिका निवेंडकर शिक्षणासाठी सध्या लंडन येथील ससेक्स युनिव्हर्सिटीमध्ये पदव्युत्तर पदवीचे शिक्षण घेत आहे. बुधवारी पहिल्यांदाच तिने मतदान केले. गुरुवारी ती पुन्हा लंडनसाठी रवाना होणार आहे.

तिचे वडील रत्नागिरी जिल्हा परिषदेत सेवेत असून आई मुंबईत शासकीय औद्योगिक प्रशिक्षण संस्थेत कार्यरत आहे. सानिकाने बुधवारी पहिल्यांदाच मतदानाचा हक्क बजावल्याने तिने आनंद व्यक्त केला आहे.