माळशिरसमध्ये 345 मतदान केंद्रांवर 1745 कर्मचारी रवाना:विधानसभा क्षेत्रात 610 कर्मचाऱ्यांची नियुक्ती

माळशिरस विधानसभा मतदारसंघाच्या निवडणुकीसाठी १७४५ प्रशिक्षित कर्मचारी शेवटचे तिसरे प्रशिक्षण घेऊन दुपारी निवडणूक साहित्य घेऊन आपल्याला नेमून दिलेल्या ठिकाणी मार्गस्थ झाले. माळशिरस विधानसभा मतदार संघात एकूण ३४५ मतदार संघ असले तरी त्यामध्ये एकही अतिसंवेदनशील असा मतदार संघ नाही.या निवडणुकीसाठी एकूण १७४५ कर्मचारी नियुक्त केले असून त्यांना तीन वेळा प्रशिक्षण देण्यात आले आहे. या कर्मचाऱ्यांना मतदान केंद्रावर पोहोच करण्यासाठी ४६ बसेस तसेच ३४ जीपची व्यवस्था करण्यात आली आहे. त्यामुळे कृषी उत्पन्न बाजार समितीला एसटी आगाराचे स्वरूप आले होते. त्यांच्याजवळ तालुक्यातील एकूण ३४५ मतदान केंद्रासाठी लागणारे सर्व साहित्य देण्यात आले. या वेळी नियुक्त कर्मचाऱ्यांपैकी काहीनी नियुक्तीचे ठिकाण बदलण्याचीही मागणी केली. सुरक्षतेच्या दृष्टीने ६९० पोलिस कर्मचाऱ्यांची नियुक्ती करण्यात आली आहे. या मतदारसंघात असलेल्या ३ लाख ४९ हजार ५६८ मतदारात महीला १ लाख ६९ हजार २१४ तर पुरुष १ लाख ८० हजार ३२२ व इतर ३२ असे मतदार आहेत. महिला मतदार केंद्र चार, युवा मतदान केंद्र चार व दिव्यांग मतदान केंद्र दोन ठेवण्यात आली आहेत. १७३ मतदान केंद्रांवर वेबकास्टिंग करण्यात आले असून, प्रत्येक हालचालीवर नजर ठेवण्यात येणार आहे. निवडणूक कर्मचारी ने-आण करण्यासाठी एसटी बसेस गेल्याने अकलूज एसटी आगाराला जवळच्या व लांबच्या मिळून जवळपास ३२० खेपा रद्द कराव्या लागल्याचे सांगण्यात आले.