मिंधेंना भाव मिळतो; मग शेतकऱ्यांच्या सोयाबीन, कापसाला भाव का मिळत नाही? सिल्लोडमध्ये उद्धव ठाकरे यांनी गद्दारांवर आसूड ओढला

मराठवाडा, विदर्भ, उत्तर महाराष्ट्र जिथे जातोय तिथे सगळ्यांची एकच ओरड आहे की सोयाबीनला भाव नाही, कापसाला भाव नाही. शेतकऱ्यांच्या मालाला हमीभाव नाही. गद्दारांना 50 खोके मिळत असतील तर राब राब राबणाऱ्या शेतकऱ्यांच्या हक्काचे का मिळू नये? असा सवाल करत शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांनी गद्दारांवर आसूड ओढला.

सिल्लोड मतदारसंघाचे महाविकास आघाडीचे अधिकृत उमेदवार सुरेश बनकर यांच्या प्रचारासाठी शुक्रवारी शिवसेना पक्षप्रमुख उद्धव ठाकरे यांची सिल्लोडमध्ये दणदणीत सभा झाली. यावेळी त्यांनी गद्दार आमदार अब्दुल सत्तारसह मिंधे, भाजप आणि मोदी-शहांना झोडपून काढले.