मुंबईतील ‘या’ परिसरात मुस्लिमांना कोणी घर देत नाही? सैफ अली खानचा जुनी मुलखत व्हायरल

अभिनेता सैफ अली खान आता वांद्रे येथील उच्चभ्रू सोसायटीमध्ये कुटुंबासोबत राहत आहे. पण अभिनेत्याला मुंबईतील जुहू याठिकाणी घर खरेदी करायचं होतं. पण अभिनेत्याला जुहू याठिकाणी घर खरेदी करता आलं नाही. एका मुलाखतीत अभिनेत्याने मागचं कारण देखील सांगितलं होतं. मुस्लिम असल्यामुळे मला जुहू याठिकाणी घर खरेदी करता आलं नाही… असं अभिनेता एका जुन्या मुलाखतीत म्हणाला होता.

मुलाखतीत सैफ अली खान म्हणाला होता, ‘एक मुसलमान असून तुम्ही जुहू याठिकाणी घर खरेदी करण्याचा प्रयत्न करत असाल तर, ‘आम्ही मुस्लिम लोकांना घर देत नाही..’ असं बोलून नकार दिला जातो.’ एवढंच नाही तर, अभिनेत्याने भारतात होणाऱ्या भेदभावावर देखील मोठं वक्तव्य केलं.

‘मानवी स्वभाव कधीच साधा असू शकत नाही आणि तो कधी होणार देखील नाही… एक पुरुष त्याच्या बायकोसोबत भांडतो, भावंड एकमेकांसोबत भांडतात… हे स्वाभाविक आहे. एक देश दुसऱ्या देशासोबत भांडतो. एक धर्म दुसऱ्या धर्मासोबत भांडतो… भांडणं सामान्य आहे. मला असं वाटतं की शांती आणि समज असामान्य आहे.’ असं अभिनेता म्हणाला.

सैफ अली खान याच्याबद्दल सांगायचं झालं तर, अभिनेता सध्या 16 जानेवारी रोजी झालेल्या हल्ल्यामुळे चर्चेत आहे. हल्लेखोराने गंभीर वार केल्यानंतर सैफला तात्काळ रुग्णालयात दाखल करण्यात आलं. आता अभिनेत्याची प्रकृती स्थीर असून डॉक्टरांनी एक महिना आराम करण्याचा सल्ला सैफ याला दिला आहे.

सैफच्या आगामी सिनेमांबद्दल सांगायचं झालं तर, हल्ला होण्यापूर्वी सैफ ‘ज्वेल थीफ : द रेड सन चॅप्टर’ सिनेमाचं शुटिंग करत होता. आता अभिनेत्याची प्रकृती पाहता दिग्दर्शकाने सिनेमाची शुटिंग काही काळासाठी रद्द केली आहे. ‘ज्वेल थीफ : द रेड सन चॅप्टर’ सिनेमा शिवाय सैफ अली खान ‘रेस 4’, ‘स्पिरिट’, ‘देवरा: पार्ट 1’, ‘देवरा: पार्ट 2’ सिनेमात देखील दिसणार आहे.

तामीळ दिग्दर्शक बालाजी मोहन दिग्दर्शित ‘क्लिक शंकर’ सिनेमात देखील सैफ झळकणार आहे. संजय गुप्ता दिग्दर्शित ‘शूटआऊट एट बायकुला’ सिनेमात देखील सैफ दिसणार आहे. एवढंच नाही तर, लेक सारा अली खान हिच्यासोबत देखील सैफ पहिल्यांदा स्क्रिन शेअर करणार असल्याची चर्चा रंगली आहे. सारा आणि सैफ यांच्या सिनेमा संबंधी अद्याप कोणती अधिकृत माहिती समोर आली नाही.