मोरेवाडी येथे ७ गावठी दारू अड्डे उद्ध्वस्त; राजारामपुरी पोलिसांची कारवाई

कोल्हापूर : मोरेवाडी (ता. करवीर) येथील सात गावठी दारू निर्मिती करणारे अड्डे जेसीबीच्या साह्याने उद्ध्वस्त केले. राजारामपुरी पोलीस ठाण्याचे निरीक्षक सुशांत चव्हाण आणि त्यांच्या भरारी पथकाने केलेल्या या कारवाईत दहा लाखाचा दारू साठा नष्ट करण्यात आला.

राजारामपुरी पोलिसांच्या धडक कारवाईमुळे मोरेवाडीसह परिसरातील हातभट्टीवाले पसार झाले आहेत. त्यांच्या शोधासाठी पोलिसांची पथके रवाना करण्यात आली आहेत. तीन पोलीस अधिकाऱ्यांसह २५ पोलीस सकाळपासून या मोहिमेवर आहेत. गेल्या दोन वर्षातील ही पहिलीच कारवाई असल्याचे पोलीस निरीक्षक सुशांत चव्हाण यांनी सांगितले. मदतीसाठी राज्य उत्पादन शुल्काचा फौजफाटा ही मोरेवाडी परिसरात मागविण्यात आला आहे. या कारवाईमुळे मोरेवाडी परिसरातून समाधान व्यक्त होत आहे.