मुख्यमंत्रीपदावेळी आम्ही त्याग केला, आता तुम्ही झुकते माप घ्या:गृहमंत्री अमित शहा थेटच बोलले, मुख्यमंत्री शिंदेंसमोर पेच प्रसंग

आगामी विधानसभा निवडणुकीच्या तोंडावर महायुतीमध्ये जागावाटपावरून काही मतभेद सुरू आहेत. दिल्ली येथे महायुतीची जागावाटपाची चर्चा सुरू असून यात गृहमंत्री अमित शहा यांनी मुख्यमंत्री एकनाथ शिंदे यांना उद्देशून वक्तव्य केले आहे. ज्यामुळे मुख्यमंत्री एकनाथ शिंदे यांना झुकते माप घ्यावे लागणार असल्याचे दिसते. काय म्हणाले अमित शहा? गृहमंत्री अमित शहा म्हणाले, शिंदे जी, या देशात पंतप्रधान, मुख्यमंत्री आणि प्रांत ही तीनच पदे महत्त्वाची आहेत. बाकी गृहमंत्र्यांसह सर्व पदे फक्त व्यवस्था आहे. ती काम पूर्ण होण्यासाठी केलेली व्यवस्था आहे. आम्ही तुम्हाला मुख्यमंत्रिपद दिले. तुमच्यासाठी आमच्या माणसांना त्याग करावा लागला. त्यामुळे जागावाटपात मित्रपक्षांना झुकते माप द्या, असे अमित शहा यांनी मुख्यमंत्री एकनाथ शिंदे यांना सल्ला दिला आहे. महाराष्ट्राच्या विधानसभा निवडणुकीच्या जागावाटपात गृहमंत्री अमित शहा जातीने लक्ष देत असल्याचे स्पष्ट दिसत आहे. मुख्यमंत्रीपद हे मुख्यमंत्री एकनाथ शिंदे यांच्याकडे आहे म्हणजे शिवसेनेकडे आहे. त्यामुळे मित्रपक्षांना त्यांनी जास्तीत जास्त जागा द्याव्यात, असा आग्रह भाजपकडून केला जात आहे. यामुळे एकनाथ शिंदे यांना भाजपसमोर झुकते माप घ्यावे लागणार असल्याचे दिसत आहे. अजित पवारांच्या राष्ट्रवादीला जास्त जागा मिळवून देण्यासाठी प्रयत्न दरम्यान, अजित पवार यांच्या राष्ट्रवादी कॉंग्रेस पक्षाला देखील चांगल्या जागा मिळाव्यात यासाठी भाजपच्या केंद्रीय नेतृत्वात प्रयत्न सुरू असल्याचे समजत आहे. तसेच अजित पवारांचा पक्ष महायुतीकडून लढणार आहे त्यामुळे अजित पवारांना सत्तेत सामील होताना भाजपने जो शब्द दिला होता तो शब्द पाळणार असल्याची माहिती आहे. काय म्हणाले खासदार नरेश म्हसके? दरम्यान, गृहमंत्री अमित शहा यांनी मुख्यमंत्री एकनाथ शिंदे यांना केलेल्या आग्रहावर शिवसेना खासदार नरेश म्हसके यांनी प्रतिक्रिया दिली आहे. नरेश म्हसके म्हणाले, आमच्यामध्ये जागावाटपासंदर्भात कोणताही वाद नाही. आमचे जागावाटप पूर्ण झाले आहे. एकमेकांना समजून घेऊन ते झाले असल्याने कोणताही वाद नाही, असे नरेश म्हसके यांनी सांगितले आहे.