राष्ट्रवादीत चांद्यापासून बांद्यापर्यंत इनकमिंग जोरात सुरू:शरद पवार गटाच्या बड्या नेत्याबाबत योग्य निर्णय घेऊ - सुनील तटकरे

विधानसभा निवडणुकीनंतर महाविकास आघाडीतील पक्षांना गळती लागल्याचे दिसून येत आहे. ठाकरे गटाचे अनेक पदाधिकारी आणि नेते शिंदे गटात सामील झाले आहेत. आता शरद पवार गटातील काही नेते अजित पवार गटात जाणार असल्याची चर्चा सुरू आहे. प्रदेशाध्यक्ष सुनील तटकरे यांनी याबाबतचे संकेतच दिले आहेत. आमच्या पक्षात इनकमिंग सुरू असल्याचे सांगत, एक बडा नेताही येणार असल्याचे सुनील तटकरे यांनी सांगितले. राष्ट्रवादी काँग्रेस अजित पवार पक्षाचे प्रदेशाध्यक्ष सुनील तटकरे यांनी आज माध्यमांशी संवाद साधला. यावेळी त्यांनी आपल्या पक्षातील इनकमिंगवर सूचक विधान केले. तसेच रामदास कदम यांनी राष्ट्रवादी काँग्रेसवर केलेल्या आरोपावरही भाष्य केले. रामदास भाई आणि माझे चांगले संबंध आहेत. त्यांची काही तक्रार असेल, तर मी त्याबाबत माहिती घेईल, असे सुनील तटकरे म्हणाले. संजीवराजे निघून गेल्यावरही आमचा विजय सुनील तटकरे म्हणाले की, रामराजे नाईक निंबाळकर, संजीवराजे निंबाळकर हे मागे अजितदादांना भेटले होते. त्यांची दादांसोबत सखोल चर्चाही झाली. पण याबाबत निर्णय झाला नाही. विधानसभा निवडणुकीच्यावेळी संजीवराजे असतील किंवा इतरांनी या सर्वांनीच शरद पवार साहेबांसोबत जाण्याचा निर्णय घेतला होता. संजीवराजे निघून गेल्यावर सुद्धा त्यांच्या मतदारसंघात राष्ट्रवादीच्या घड्याळ चिन्हावर आमचा विधानसभेचा उमदेवार विजयी झाला आहे. राष्ट्रवादीत चांद्यापासून बांद्यापर्यंत इनकमिंग सुरू सुनील तटकरे पुढे बोलताना म्हणाले की, संजीवराजे यांना पक्षात प्रवेश द्यायचा की नाही, हे राज्यसभा सदस्य नितीन पाटील आणि जिल्हाध्यक्ष यांच्याशी चर्चा करू आणि योग्य तो निर्णय घेऊ. तसेच आता आमच्या पक्षात चांद्यापासून बांद्यापर्यंत इनकमिंग जोरात सुरू आहे, असे सूचक विधानही सुनील तटकरे यांनी केले. रामदास कदमांच्या आरोपावर केले भाष्य राष्ट्रवादीच्या नेत्यांनी विधानसभा निवडणुकीत योगेश कदम यांच्यासाठी काम केले नाही, असा आरोप रामदास कदम यांनी केला होता. त्यांच्या आरोपावरही सुनील तटकरे यांनी प्रतिक्रिया दिली. माझ्याकडे जेव्हा शिवसेना नेते रामदास कदम हे तक्रार करतील तेव्हा त्याची मी जरूर माहिती घेईल. रामदास भाईंनी जरूर लवकरात लवकर मला ते पत्र द्यावे. त्याचे मी अवलोकन करून माहितीही घेईल. लोकसभा आणि विधानसभेला काय काय घडले, ते समजून घेईल. रामदास भाई आणि माझे चांगले संबंध आहेत. आम्ही चर्चा करू, असे तटकरे म्हणाले.