रुग्णालयांत उपचार मोफत द्यावेत: नीलम गोर्‍हे

Published on

: 

31 Jan 2025, 8:38 am

Updated on

: 

31 Jan 2025, 8:38 am

पुणे: महापालिका रुग्णालयांत सर्व उपचार मोफत द्यावेत. रुग्णालय प्रशासनाने रुग्णांना बाहेरून औषधे आणायला लावू नये, अशा सूचना बैठकीत केल्या आहेत, अशी माहिती विधानपरिषदेच्या उपसभापती नीलम गोर्‍हे यांनी दिली.

पुणे जिल्हा नियोजन समितीच्या बैठकीनंतर त्यांनी पत्रकारांशी संवाद साधला, त्या वेळी त्या बोलत होत्या. त्या म्हणाल्या, जीबीएस आजाराच्या पार्श्वभूमीवर पुणेकरांनी पाणी गरम करून प्यावे तसेच नागरिकांनी आपल्या परिसरात ड्रेनेजलाइनमधून पिण्याच्या पाण्याची जलवाहिनी जात असेल तर याबाबत खबरदारी घ्यावी आणि प्रशासनाला कळवावे.

शैक्षणिक दर्जा खालावल्याप्रकरणी असरच्या अहवालावर चर्चा केली. शालेय विद्यार्थ्यांच्या शिक्षणाचा दर्जा वाढविण्याच्या विषयावर स्वतंत्र बैठक घेणार आहे. जीबीएसबाबत महानगरपालिकेच्या दवाखान्यात बाहेरची औषधे लिहून दिली जात आहेत.

महानगरपालिकेच्या हॉस्पिटलमध्ये सर्व औषधे मिळायलाच हवीत. खासगी हॉस्पिटलमध्ये आर्थिक पिळवणूक झाली नाही पाहिजे. नियोजन समितीकडे निधी आहे, त्याची कमी पडणार नाही, याची काळजी घेतली जाईल, असेही त्या जिल्हा नियोजन समितीच्या बैठकीनंतर म्हणाल्या.