विनेश फोगाटने जिंकली राजकारणाच्या मैदानावरील पहिली कुस्ती

नवी दिल्ली : पुढारी वृत्तसेवा : हरियाणा विधानसभा निवडणुकीचे निकाल जाहीर झाले. यामध्ये काँग्रेस उमेदवार कुस्तीपटू विनेश फोगाट (Vinesh Phogat) यांनी जुलाना मतदारसंघातून विजय मिळवला. तर हिसार मतदार संघातून उद्योजिका सावित्री जिंदाल यांनी अपक्ष लढत विजयी पताका फडकवली. हरियाणा विधानसभेच्या निकालात या दोन राजकीय पटलावरील महिलांच्या विजयाची चर्चा देशभरात होत आहे.

कुस्तीपटू विनेश फोगाटने (Vinesh Phogat) हरियाणा विधानसभेत जुलाना मतदारसंघातून दणदणीत विजय मिळवला. भाजप उमेदवार योगेश बैरागी यांचा त्यांनी पराभव केला. सुरुवातीला मतमोजणीत विनेश फोगाट मागे होत्या. नंतरच्या फेऱ्यांमध्ये मात्र त्यांनी आघाडी कायम ठेवली. काही दिवसांपूर्वी पार पडलेल्या पॅरिस ऑलम्पिकमध्ये काहीशा जास्त वजनामुळे विनेश फोगाट कुस्तीच्या अंतिम फेरीपुर्वी अपात्र ठरल्या होत्या. सबंध देश सुवर्णपदकाची अपेक्षा करत असताना पदकापासुनच मुकावे लागले होते. विधानसभेच्या राजकीय पटलावर मात्र त्या पात्र ठरल्या आहेत आणि राजकीय वजन देखील या निमित्ताने वाढले आहे.

हरियाणा विधानसभा निवडणुकीत चर्चेत असलेल्या चेहऱ्यांपैकी विनेश फोगाट (Vinesh Phogat) हा एक प्रमुख चेहरा होता. हरियाणा विधानसभा निवडणुकीच्या तोंडावर विनेश फोगाट आणि बजरंग पुनिया यांनी काँग्रेसमध्ये प्रवेश केला. विनेश फोगाटला काहीशा अतिरिक्त वजनामुळे ऑलिंपिकमधून अपात्र व्हावे लागले, यावर संबंध देशाने दुःख व्यक्त केले होते. त्यानंतर कुस्तीला रामराम ठोकत विनेश फोगाटने राजकीय कुस्तीच्या मैदानात लढणे पसंत गेले. काँग्रेस उमेदवार म्हणून जुलाना मतदारसंघातून निवडणूक लढवली आणि जिंकली.

विनेश फोगाटने निवडणूक जिंकल्यानंतर देशभरातून त्यांचे अभिनंदन केले जात आहे. ‘संपूर्ण देश आदिशक्तीचा उत्सव साजरा करत असताना बलाढ्य आव्हानांना, अन्यायाला पुरून उरलेल्या "स्त्री शक्ती"चा हा विजय सुखावणारा आहे.’ अशा शब्दात राष्ट्रवादी काँग्रेस शरद पवार गटाचे खासदार अमोल कोल्हे यांनी विनेश फोगाटचे अभिनंदन केले आहे. तर कुस्तीपटू साक्षी मलिक, बजरंग पुनिया,अन्य खेळाडूंसह विविध क्षेत्रातील लोकांनी देखील विनेश फोगाटचे अभिनंदन केले आहे.

८४ वर्षीय सावित्री जिंदाल उद्योग क्षेत्रात प्रसिद्ध असलेल्या ओपी जिंदाल समूहाच्या प्रमुख आहेत. देशातील सर्वात श्रीमंत महिला म्हणूनही त्या प्रसिद्ध आहेत. उद्योग क्षेत्रात कार्यरत असताना गेल्या अनेक वर्षांपासून त्या राजकारणातही सक्रिय आहेत. यापूर्वी त्या काँग्रेस पक्षात होत्या. काँग्रेसमध्ये असतानाही त्यांनी हिसारचे प्रतिनिधित्व केले आहे. त्यांचे दिवंगत पती ओपी जिंदाल या मतदार संघातून तीन वेळा निवडून आले होते. दरम्यान, २०१३ मध्ये हुड्डा सरकारमध्ये त्या मंत्री देखील होत्या. त्यापुर्वी २००५ आणि २००९ ला त्यांनी विधानसभा निवडणूक जिंकली होती. २०१४ ला मात्र त्यांचा पराभव झाला होता.