विवाहितेला लग्नाचे अमिष दाखवून अत्याचार:तरुणावर सेनगाव पोलिस ठाण्यात गुन्हा दाखल

सेनगाव पोलिस ठाण्यांतर्गत एका गावात विवाहितेलाच लग्नाचे अमिष दाखवून अत्याचार केल्याची घटना घडली आहे. त्यानंतर विवाहितेने लग्नाबाबत विचारणा केली असता तिला मारहाण करून जिवे मारण्याची धमकी देण्यात आली. या प्रकरणी सेनगाव पोलिस ठाण्यात गुन्हा दाखल झाला आहे. पोलिसांनी आरोपी तरुणाला अटक केली आहे. पोलिसांनी दिलेल्या माहितीनुसार, सेनगाव पोलिस ठाण्यांतर्गत एका गावातील विवाहित महिलेला गजानन जोगदंड (रा. बरडा पिंपरी) हा नेहमीच भेटत होता. त्यानंतर त्याने त्या विवाहित महिलेस प्रेम करण्यासाठी चक्क धमकीच दिली. तु माझ्या सोबत प्रेम केले नाही तर बघून घेईल अशी धमकी दिली. त्यानंतर त्या महिलेचा विनयभंग केला. दरम्यान, त्या महिलेस धमकी देऊन तिला मागील एक वर्षात सेनगाव, हिंगोली, मेहकर या ठिकाणी नेऊन तिच्यावर वेळोवेळी अत्याचार केला. मात्र त्याला घाबरून महिलेने कुठेही वाच्यता केली नाही. त्यानंतर त्या महिलेने लग्नाबाबत विचारणा केली, माझ्या सोबत लग्न करा असे म्हटल्यानंतर गजानन याने त्या महिलेस मी तुझ्या सोबत लग्न करणार नाही असे म्हणत तिला धुडकावून दिले. तसेच मारहाण करून जिवे मारण्याची धमकी दिली. या प्रकारामुळे त्या विवाहितेने बुधवारी ता. 5 सायंकाळी थेट सेनगाव पोलिस ठाणे गाठून तक्रार दाखल केली. यावरून पोलिसांनी गजानन जोगदंड याच्या विरुध्द गुन्हा दाखल केला आहे. घटनेचे गांभीर्य लक्षात घेऊन पोलिस निरीक्षक संतोष तांबे, सहाय्यक पोलिस निरीक्षक अशोक घारगे, जमादार तिंचटारे, सुभाष चव्हाण यांच्या पथकाने घटनास्थळी भेट दिली. त्यानतंर तातडीने गजानन यास अटक केली आहे. सहाय्यक पोलिस निरीक्षक घारगे पुढील तपास करीत आहेत.