सोलापूर : चाकूचा धाक दाखवून व्यवसायिकाला लुटले

टेंभुर्णी : मोडनिंब येथील पालखी मार्गावरील रेल्वे ब्रिजखाली रात्रीच्या सुमारास एका व्यवसायिकाला लुटल्याचा प्रकार उघडकीस आला आहे. दोन चोरट्यांनी डोळ्यात चटणी टाकून चाकूचा धाक दाखवत तीन सोन्याच्या अंगठ्या, सोन्याची चेन, चांदीची अंगठी असा ६५ हजाराचा ऐवज चोरट्यांनी लुटून नेला. ही घटना सोमवारी (दि.२५) रात्री ९ : ३० च्या सुमारास घडली.

याबाबत अधिक माहिती अशी, मोडनिंब (ता.माढा) येथील सचिन संजय जाधव (वय २४) हा व्यवसायिक असून रात्री ९:३० च्या सुमारास दुकान बंद करून मोटारसायकलवरून घराकडे निघाला होता. तो मोडनिंब येथील पालखी मार्गावरील रेल्वे ब्रिजजवळ आला असता तेथे दबा धरून बसलेल्या दोन चोरटयांनी त्याला अडवून डोळ्यात चटणी टाकली. व चाकूचा धाक दाखवून तीन सोन्याच्या अंगठ्या, सोन्याची चेन, चांदीची अंगठी असा ६५ हजाराचा ऐवज चोरट्यांनी लुटून नेला. याप्रकरणी टेंभुर्णी पोलिस ठाण्यात गुन्हा दाखल करण्यात आला असून अधिक तपास महिला पोसई स्वाती सुरवसे या करीत आहेत.