Civil Hospital Thane | दाेन लहानग्यांवर मोतीबिंदूची जोखमीची शस्त्रक्रिया

मुरबाड परिसरातील पाच वर्षांची राणी (नाव बदलून) आणि आंबिवलीतील दहा वर्षांचा विजय (नाव बदलून) या दोन्ही मुलांना मोतीबिंदू झाला होता. राणीला सुरुवातीच्या तीन वर्षात डोळ्यांनी व्यवस्थित दिसत होत. मात्र पुढे दोन्ही डोळ्यांना मोतीबिंदू झाल्यामुळे अस्पष्ट दिसत होत. याच प्रमाणे विजयला देखील दोन्ही डोळ्यांना मोतीबिंदू झाला होता. मुरबाड सारख्या तालुक्यात डोळ्यांची शस्त्रक्रिया करणे कुटुंबासाठी मोठी गोष्ट होती. सरकारी रुग्णालयात मोतीबिंदू शस्त्रक्रिया करायची झाल्यास कुठे करावी असा प्रश्न दोन्ही मुलांच्या पालकांना होता. दरम्यान, सिव्हील रुग्णालयात मोतीबिंदू शस्त्रक्रिया चांगली होत असल्याचे त्यांना समजले. या दोन्ही मुलांना रुग्णालयात दाखल केल्यानंतर जिल्हा शल्य चिकित्सक डॉ. कैलास पवार आणि अतिरिक्त जिल्हा शल्य चिकित्सक डॉ. धीरज माहांगडे यांच्या मार्गदर्शाखाली दोघांच्या डोळ्यांची मोतीबिंदू शस्त्रक्रिया यशस्वी पार पडली असल्याची माहिती नेत्र सर्जन डॉ. शुभांगी अंबाडेकर यांनी दिली. मोतीबिंदू शस्त्रक्रिया झाल्यावर इम्पोर्टेड लेन्सची आवश्यकता असे यासाठी रोटरी क्लब ऑफ ठाणे हिरानंदानी लिजेंडचे अध्यक्ष नीलेश दाहिफुले यांनी मदत केली. मोतीबिंदू शस्त्रक्रियेसाठी नेत्रशल्य चिकीत्सक डॉ. शुभांगी अंबाडेकर, भूलतज्ज्ञ डॉ.रुपाली यादव, डॉ. राहुल गुरव, रेश्मा पवार, ज्योती गरड, नम्रता काशीद, मिलिंद दौंडे, दिगंबर मामा, आदींनी परिश्रम घेतले.