महायुतीचे उमेदवार विलास भुमरेंच्या हाता-पायाला फ्रॅक्चर:चक्कर येऊन गॅलरीतून कोसळले, ऑपरेशन होणार असल्याची माहिती

पैठण विधानसभा मतदारसंघाचे महायुतीचे उमेदवार विलास भुमरे चक्कर येऊन कोसळल्याने त्यांना डाव्या बाजूने हाता-पायाला 4 ठिकाणी फ्रॅक्चर झाले आहे. त्यांना संभाजीनगरच्या गॅलेक्सी हॉस्पिटलमध्ये दाखल करण्यात आलेल आहे. डॉक्टरांनी प्रकृती बरी असून काळजी काही कारण नसल्याची माहिती दिली आहे. दरम्यान त्यांचे बंधू शिवराज भूमरे यांनी दिलेल्या माहितीनुसार यापुढे काही दिवस ते प्रचारात सहभाग नोंदवू शकणार नाही. आज त्यांचे ऑपरेशन केले जाणार आहे. निवडणुकीच्या प्रचारात वेळेवर जेवण आणि झोप होत नसल्याने त्यांना चक्कर आल्याचे डॉक्टरांचे म्हणणे आहे. नेमके काय घडले? विलास भुमरे हे पाचोड येथील आपल्या निवासस्थानी आज पहाटे भोवळ आल्याने गॅलरीमधून खाली पडले. यात ते जखमी झाले आहेत. त्यामुळे त्यांचे पुढील नियोजित दौरेही रद्द करण्यात आले आहे. त्यांच्या डाव्या हाताला आणि पायाला चार ठिकाणी फ्रॅक्चर झाले आहे. भुमरेंची मतदारसंघात मोठी ताकद विलास भुमरे यांनी जिल्हा परिषद सदस्य आणि जिल्हा परिषदेत बांधकाम सभापतीपद सांभाळले आहे. पैठण विधानसभा मतदारसंघातून विलास भुमरे यांना शिवसेना शिंदे गटाकडून उमेदवारी देण्यात आली आहे. संदीपान भुमरे 1995 व 1999,2004 मध्ये सलग निवडून आले होते. पण 2009 मध्ये संजय वाघचौरे यांनी त्यांचा पराभव केला होता. यानंतर 2014 आणि 2019 पुन्हा संदीपान भुमरेंनी या मतदारसंघाचे नेतृत्व केले आहे. यावेळी ते छत्रपती संभाजीनगरचे खासदार म्हणून निवडून आल्याने त्यांनी मुलाला निवडणुकीच्या रिंगणात उतरवले आहे. या मतदारसंघावर 1990 पासून शिवसेनेचा वरचष्मा आहे. 1990 मध्ये अप्पासाहेब वाघचौरे 42 हजार 273 मते घेऊन निवडून आले होते. पण त्यानंतर भुमरे यांना या मतदारसंघ बांधला.