मराठा समाजाला विरोध करणाऱ्याला पाडा, येवल्यातून जरांगे पाटलांचे आवाहन

नाशिक पुढारी ऑनलाइन डेस्क | मनोज जरांगे पाटील आज येवला मतदारसंघाच्या दौऱ्यावर आहेत. राष्ट्रवादी अजित पवार गटाचे नेते छगन भुजबळ यांचा हा मतदारसंघ आहे. त्यामुळे येवल्यात आज राजकारण चांगलेच पेटण्याची शक्यता आहे. कारण, मराठा आरक्षणाला भुजबळांच्या असलेल्या विरोधामुळे जरांगे पाटील येथे काय भूमिका घेतात ते पाहणे महत्वाचे आहे.

दरम्यान, जरांगे पाटील यांनी माध्यमांशी संवाद साधताना छगन भुजबळ यांच्यावर हल्ला चढविला आहे. मी कोणाला पाडा हे सांगायला मी आलो नाही. मात्र मराठा समाजाला विरोध करणाऱ्याला पाडा असे आवाहन जरांगे पाटील यांनी केलं आहे. तसेच येवल्यातील मराठा समाज हा आपल्यासोबत असल्याचा दावा छगन भुजबळ यांनी केला होता, भुजबळांनी केलेल्या या दाव्याची जरांगे पाटील यांनी खिल्ली उडवली. कोणी बरोबर आसल्याने काही मते पडत नाही. बरोबर असून कार्यक्रम होता असे जरांगे पाटील यांनी सुनावलं.

माझ्या पोटात एक आणि ओठात एक अस काही नाही. मी ठरवले तर डायरेक्ट कार्यक्रम करतो असा इशारा दिला. आता एक माईक जुना झाला म्हणून दुसरा हातात घेतला. तो सारखा सारखा बिघडतो. त्यामुळे नवा हातात घेतला. माईकचे उदाहरण देत भुजबळांना त्यांनी लक्ष केलं.