IFFI 2024 | सुजय डहाकेच्या 'तुझ्या आयला'चे पोस्टर इफ्फीमध्ये लाँच

पुढारी ऑनलाईन डेस्क - सुजय एस. डहाकेचा नवीन चित्रपट 'तुझ्या आयला'चे पोस्टर इफ्फीमध्ये लाँच झाले. 'शाळा', 'फुंतरू' आणि 'श्यामची आई' यासारख्या चित्रपटांमध्ये त्याच्या धाडसी कथाकथनासाठी ओळखला जाणाऱ्या सुजयने शाब्दिक शिवीगाळ आणि त्याचा समाजावर होणारा परिणाम दर्शवण्याचा प्रयत्न केला आहे. गोव्यातील प्रतिष्ठित अशा इंटरनॅशनल फिल्म फेस्टिव्हल ऑफ इंडिया (इफ्फी) मध्ये 'तुझ्या आयला'च्या बहुप्रतीक्षित पोस्टरचे नुकतेच अनावरण करण्यात आले, ज्यामुळे या चित्रपटाबाबतची उत्सुकता आणि उत्साह अधिक वाढला आहे.

सुनील जैन, प्रकाश फिल्म्स, प्रशांत बेहेरा आणि वन स्टॉप मीडिया प्रस्तुत 'तुझ्या आयला'ची निर्मिती पुणे फिल्म कंपनी आणि कल्ट डिजिटलच्या बॅनरखाली करण्यात आली आहे. सुनील जैन, आदित्य जोशी, सुजय डहाके, अश्विनी परांजपे या चित्रपटाचे निर्माते असून मेघना प्रामाणिक, देबाशीष प्रामाणिक, राजेश सिंग आणि अंकित चंदिरामाणी सहनिर्माते आहेत. 'शिवी नाय खेळाचं नाव हाय ते', ही टॅगलाईन चित्रपटाच्या मध्यवर्ती कल्पनेचे भाषांतर करण्यासाठी पुरेशी आहे.

शाब्दिक शिवीगाळ हा खेळ नाही - ही एक मोठी परिणामाची बाब आहे. चित्रपटाची कथा मुलांच्या भावनिक जीवनाभोवती फिरते आणि त्यांच्या तोंडी येणारी शिवीगाळ खेळकर पद्धतीने तसेच खेळीमेळीच्या वातावरणात सादर करण्यात आली आहे. ही थीम विशेषत: आजच्या जगाला साजेशी आहे, जिथे ऑनलाइन ट्रोलिंगने शाब्दिक हिंसेला चिंताजनक पातळीवर नेले आहे. शब्द शारिरीक आघातांइतकेच खोलवर जखमा करू शकतात आणि आपण किती अनौपचारिकपणे अशी भाषा वापरतो जिच्या जखमा मनावर चिरकाल राहतात हे चित्रपटाद्वारे सांगण्याचे खरे आव्हान होते.