Maharashtra Assembly Poll : प्रचारासाठी उरले अवघे ७२ तास

छत्रपती संभाजीनगर, पुढारी वृत्तसेवा : विधानसभा निवडणुकीच्या जाहीर प्रचारासाठी अवघ्या ७२ तासांचा अवधी उरला आहे. त्यामुळे पुढील तीन दिवस उमेदवारांना सभा, रॅली आणि बैठकांचा धडाका सुरू राहणार आहे. निवडणुकीचा प्रचार सोमवारी (दि. १८) सार्यकाळी ६ वाजेच्या ठोक्याला थांबवणार आहे.

जिल्ह्यातील नऊ विधानसभा मतदारसंघांत २० नोव्हेंबर रोजी मतदान होणार आहे. नऊ मतदारसंघांत एकूण १८३ उमेदवार निवडणूक रिंगणात आहेत. या उमेदवारांच्या प्रचाराला ४ नोव्हेंबरपासून सुरुवात झाली. सध्या जाहीर सभा, रॅली, कॉर्नर बैठका आदींचा धडाका सुरू आहे. मात्र आता मतदानासाठी केवळ तीन दिवसांचाच वेळ शिल्लक आहे. निवडणूक आयोगाच्या निर्देशाप्रमाणे विधानसभा निवडणुकीच्या जाहीर प्रचारासाठी मुदत ही मतदान संपायच्या ४८ तासांपर्यंतच आहे. त्यानुसार जाहीर प्रचार १८ नोव्हेंबर रोजी सायंकाळी ६ वाजता संपणार आहे. त्यानंतर उमेदवार आणि राजकीय पक्षांना सभा, रॅली, बैठका घेता येणार नाहीत, असे निवडणूक विभागातील अधिकाऱ्यांनी सांगितले.

ईव्हीएम मशीनच्या सरमिसळीची प्रक्रिया पूर्ण जिल्ह्यातील नऊ मतदारसंघांत एकूण ३२७३ मतदान केंद्र आहेत. या मतदान केंद्रांवर मतदान घेण्यासाठी ईव्हीएम मशीन त्या त्या मतदारसंघात पोहोचविण्यात आल्या असून त्यांच्या सरमिसळीकरणाची प्रक्रिया पार पडली आहे. सर्व मतदारसंघात गरजेपेक्षा २० टक्के अधिक कंट्रोल युनीट आणि बॅलेट युनीट देण्यात आल्या आहेत. त्यानुसार जिल्ह्यात ३९१३ कंट्रोल युनीट आणि ७४३० बॅलेट युनीट तसेच ४२३९ व्हीव्हीपॅट मशीन पुरविण्यात आल्या आहेत.