MNS Manifesto | 'आम्ही हे करू': मनसेचा जाहीरनामा प्रसिद्ध; लोकप्रिय घोषणांना बगल

पुढारी ऑनलाईन डेस्क : महाराष्ट्र विधानसभा निवडणुकीची रणधुमाळी आता अंतिम टप्प्यात पोहोचली आहे. महाविकास आघाडी आणि महायुतीचा जाहीरनामा प्रसिद्ध झाला आहे. मनसे अध्यक्ष राज ठाकरे यांनीही आज (दि.१५) महाराष्ट्र नवनिर्माण सेनेचा जाहीरनामा प्रसिद्ध केला. महाराष्ट्रासमोरचे प्रश्न आणि त्याची उत्तरे या स्वरूपात हा विस्तृत जाहीरनामा मांडला आहे. यात फक्त पुढच्या ५ वर्षांचा नाहीतर पुढील अनेक दशकांत महाराष्ट्राने कसा आकार घेतला पाहिजे, याबद्दलचे विवेचन करण्यात आले आहे. ‘आम्ही हे करू’ या नावाने जाहीरनाम्याच्या पुस्तिकेचे अनावरण करण्यात आले. तसेच, “आम्ही हे केलं” या पुस्तिकेतून त्यांच्या कामांचा आढावा घेतला आहे.

इतर पक्षांच्या जाहीरनाम्यात लोकप्रिय घोषणांचा भडिमार करण्यात आला आहे. परंतु मनसेच्या जाहीरनाम्यात अशा घोषणांना बगल देण्यात आली आहे. राज्याची आर्थिक पत पाहता अशा योजना कितपत योग्य आहे, याकडे राज ठाकरे यांनी लक्ष वेधले आहे. त्याऐवजी शाश्वत विकासांवर भर देण्यात आला आहे. पाणी, घनकचरा, जंगल, पर्यावरण, आदीवासी, जैवविविधता, नैसर्गिक साधनसंपत्ती, औद्योगिक धोरण, वैज्ञानिक संशोधन, आरोग्य, सार्वजनिक स्वच्छता, शिक्षण, महिला सबलीकरण, झोपडपट्टी पुनर्वसन, शेती, सिंचन प्रकल्प, नद्या आदी मुद्द्यांचा परामार्श घेण्यात आला आहे.