Nandurbar : खड्डे वाचवताना बस उलटली; विद्यार्थ्यांसह वृद्ध जखमी

नंदुरबार : जिल्ह्यात अनेक रस्त्यांची झालेली दुरावस्था सध्या अपघातांना कारणीभूत ठरत असतानाच तळोदा तालुक्यात खड्डे वाचवताना बस उलटून अपघात झाल्याची आणखी एक घटना घडली. काही विद्यार्थी आणि वृद्ध प्रवासी यात जखमी झाले तथापि कोणतीही प्राणहानी झाली नसल्याचे सांगण्यात आले.

प्राप्त माहितीनुसार तळोदा धनपूर एस. टी बस रांजणी रस्त्यावरून धावत असताना अचानक उलटली आणि रस्त्याच्या पलीकडे झाडाझुडपात जाऊन पडली. अचानक घडलेल्या या घटनेमुळे बसमधून प्रवास करणारे विद्यार्थी विद्यार्थिनी कमालीचे घाबरले जीवाच्या अकांताने त्यांनी केलेला ओरडा ऐकून अन्य वाहनधारक धावून आले. मिळेल त्या वाहनाने जखमींना तळोदा उपजिल्हा रुग्णालयात हलविण्यात आले. अपघातग्रस्त बस अक्कलकुवा आगाराची असून बस क्रमांक एम. एच. 20 बीएल 19 95 आहे. धनपूर कडे जाताना ही बस रांझनी फाट्याजवळील विट पजावा जवळ रस्त्यालगत उलटली. काही विद्यार्थी आणि वृद्ध प्रवासी यात जखमी झाले तथापि कोणतीही प्राणहानी झाली नसल्याचे सांगण्यात आले.