Nashik Assembly Polls | नाशिक मध्य मतदारसंघात 56.34 टक्के मतदान

Published on

: 

21 Nov 2024, 10:33 am

Updated on

: 

21 Nov 2024, 10:33 am

दोन्ही उमेदवार समोरासमोर आल्यानंतर गिते समर्थकांकडून घोषणाबाजी सुरू झाली, परंतु पोलिसांनी वेळीच हस्तक्षेप केल्याने लोकसभा निवडणुकीतील वादाची पुनरावृत्ती टळली. नाशिक मध्य मतदारसंघात एकूण 56.34 टक्के मतदान झाले असून, उमेदवारांचे भवितव्य मतदान यंत्रात बंद झाले आहे.

जिल्ह्यातील अन्य मतदारसंघांच्या तुलनेत नाशिक मध्य मतदारसंघात सकाळच्या टप्प्यात मतदान टक्का काहीसा कमी होता. विशेषत: लोकसभा निवडणुकीत ज्या पद्धतीने सकाळच्या सत्रात मतदार घराबाहेर पडले होते, तुलनेत तितका उत्साह विधानसभा निवडणुकीच्या मतदानात दिसून आला नाही. सकाळच्या पहिल्या दोन तासांत या मतदारसंघात ७.५ टक्के मतदान झाले होते. सकाळी ९ वाजेनंतर मतदान केंद्रांमध्ये बऱ्यापैकी गर्दी जमली. जुन्या नाशकातील काही मतदान केंद्रांवर तसेच गंगापूररोड, कॉलेजरोडसारख्या उच्चभ्रू वस्तीतील मतदान केंद्रांवर मतदारांच्या रांगा लागल्याचे चित्र होते. सकाळी ११ वाजेपर्यंत नाशिक मध्य मतदारसंघात १८.४२ टक्के मतदान झाले होते.

मतदारांमध्ये महिला, ज्येष्ठ व नवमतदारांची संख्याही मोठी होती. सकाळी ११ वाजेनंतर मतदानाचा टक्का वाढत गेला. दुपारी १ वाजेपर्यंत ३०.२७ टक्के मतदान झाले होते. लोकसभा निवडणुकीत मतदानाच्या दिवशी २० मे रोजी जुन्या नाशकातील घासबाजार येथील मतदान केंद्रासमोर आ. फरांदे व माजी आमदार गिते यांच्यात बाचाबाची झाली होती. विधानसभा निवडणुकीत आ. फरांदे या भाजपच्या तिकीटावर तर गिते हे शिवसेना ठाकरे गटाकडून निवडणूक रिंगणात आहेत. त्यामुळे दोन्ही उमेदवार समोरासमोर आल्यानंतर काय घडणार, याचीच चर्चा मतदारसंघात होती. दुपारी पावणे दोनच्या सुमारास घासबाजार येथील मतदान केंद्रातून आ. फरांदे बाहेर पडत असताना आ. गिते यांच्याशी त्यांचा सामना झालाच. दोन्ही उमेदवार समोरासमोर आले. यावेळी गितेंच्या समर्थकांनी घोषणाबाजी करण्यास सुरुवात केली. मात्र, पोलिस उपायुक्त किरण चव्हाण यांनी तत्काळ हस्तक्षेप करत अवघ्या काही मिनिटांतच परिस्थितीवर नियंत्रण मिळविले. आ.फरांदे यांना भद्रकालीच्या दिशेने पुढे नेले तर, गिते हे पुढे घासबाजार मतदान केंद्रात गेले. त्यामुळे अनर्थ टळला. दुपारी ३ वाजेपर्यंत ४२.५८ टक्के तर सायंकाळी ५ वाजेपर्यंत या मतदारसंघातून ५१.४९ टक्के मतदान झाले.