Raigad Weather | आंबा बागायतदार धास्तावले, पाच दिवस थंडीसह पावसाचा अंदाज

रायगड | हवामानाचे चक्र पून्हा एकदा बदलत असून, आगामी 5 दिवस कडाक्याच्या थंडीचा इशारा असतानाच, 27 नोव्हेंबरपासून पुन्हा पावसाळी वातावरण तयार होणार असल्याचा माहिती हवामान विभागाने दिली आहे. 27 ते 30 नोव्हेंबर दरम्यान राज्यात काही ठिकाणी पाऊस किंवा ढगाळ हवामानाची शक्यता वर्तविण्यात आली आहे. परिणामी आंबा बागायतदार काहीसे धास्तावले आहेत. यंदा थंडी उशीरा सुरु झाल्याने आब्यांचा मोहोर देखील उशीराने फूटत आहे. मोहोर येण्याच्या काळातच पाऊस आला तर मोहोराचे नुकसान होण्याची शक्यता अलिबागमधील आंबा बागायतदार विश्वनाथ म्हात्रे यांनी दिली आहे.

यंदा दिवाळीच्या काळामध्ये झालेल्या पावसामुळे कोकणातील शेतकर्‍यांचे शेतीचे मोठ्या प्रमाणात नुकसान झाले. पाऊस दिवाळी पर्यंत लांबल्याने यंदा थंडीला देखील उशिराने सुरुवात झाली आहे. राज्यात काही ठिकाणी कडाक्याची थंडी पडायला सुरुवात झाली, त्यात राज्यातील उत्तर महाराष्ट्र विभागात थंडीचे प्रमाण हे इतर विभागापेक्षा अधिक आहे. रब्बी हंगामातील पिकांना देखील पोषक परिस्थिती तयार झाल्याचे दिसून येत आहे. अशातच आता हवामान खात्याने दिलेल्या अंदाजमध्ये राज्यात 27 नोव्हेंबर पासून पुन्हा एकदा पावसाळी वातावरण तयार होईल असं सांगितले आहे.

27 ते 30 नोव्हेंबर दरम्यान राज्यातील काही जिल्ह्यांमध्ये ढगाळ हवामानाची आणि पावसाची शक्यता आहे. अनेक जिल्ह्यांमध्ये थंडीची तीव्रता कमी होईल असा अंदाज आहे, भारतीय हवामान खात्याने दिलेल्या अंदाजमध्ये हरियाणा, पंजाब, आणि राजस्थानमध्ये हवेचे उच्च दाबाचे क्षेत्र तयार होत असून ते महाराष्ट्रकडे येणार्‍या थंड कोरड्या वार्‍याचा परिणाम म्हणून थंडीत वाढ दिसून येऊ शकते.