بھارت موبلٹی ایکسپو میں ای گاڑیوں پرزور

نئی دہلی/ٰیواین آئی/ ایشیا کے سب سے بڑے آٹو شو بھارت موبلٹی گلوبل ایکسپو کے دوسرے ایڈیشن میں ملک و بیرون ملک کی تمام آٹوموبائل کمپنیوں کا زور الیکٹرک گاڑیوں پر ہے۔ملک کی سب سے بڑی مسافر گاڑیاں بنانے والی کمپنی ماروتی سوزوکی انڈیا سے لے کر لگژری کار بنانے والی کمپنی پورش تک، سب نے اپنی الیکٹرک گاڑیوں کو یہاں لانچ کیا۔ماروتی سوزوکی نے اپنی پہلی الیکٹرک ایس یو وی، ای وٹارا لانچ کی ہے۔ ای وٹارا لیول 2 اے ڈی اے ایس سوزوکی کنیکٹ کے ساتھ اگلی نسل کی کنیکٹیویٹی جیسی جدید ترین خصوصیات سے لیس ہے۔ یہ کار500 کلومیٹر تک کی رینج دے سکتی ہے۔سوزوکی موٹر سائیکل انڈیا نے تین نئی مصنوعات کی نقاب کشائی کی ہے، جس میں ای-ایکسز، سوزوکی کا پہلا الیکٹرک اسکوٹر؛ نیا ایکسز 125، اور جکسر ایس ایف 250 فلیکس فیول، ہندوستان کی پہلی ای 85 اسپورٹس بائیک شامل ہیں، جو ایتھنول پر مبنی حرکیات کو فروغ دیتی ہیں۔ ہیرو موٹوکارپ نے کئی نئی گاڑیوں کی نقاب کشائی کی، جس میں ایکسٹریم 250 آر کے ساتھ 250 سی سی موٹر سائیکل سیگمنٹ میں انٹری کرنا اور ایکس پلس 210 کے ساتھ اپنے ایڈوینچر لائن اپ کو بڑھانا شامل ہے۔ اسکوٹر کے زمرے میں کمپنی نے زوم 125 اور زوم 160 متعارف کرائے ہیں۔ مزید برآں، ہیرو نے اپنی پہلی فلیکس فیول موٹر سائیکل، ایتھنول پر مبنی ہیرو ایچ ایف ڈیلکس کی نمائش کی اور ویڈا وی 2 ای اسکوٹر پیش کیا۔