September 22, 2024
File Image || DGP J&K Police
عظمیٰ ویب ڈیسک
سرینگر// ڈائریکٹر جنرل پولیس آر آر سوین نے اتوار کو کہا کہ جموں و کشمیر میں جاری اسمبلی انتخابات پہلی بار بغیر کسی خوف کے منعقد ہو رہے ہیں، جہاں انتخابی مہم جوش سے بھرپور ہے اور ووٹرز ٹرن آؤٹ پچھلے برسوں کے مقابلے میں زیادہ ہے۔
سوین نے کہا کہ موجودہ اسمبلی انتخابات اور ماضی میں ہونے والے انتخابات کے دوران زمینی صورتحال کا موازنہ کرنے کے لیے کوئی معیار موجود نہیں ہے، لیکن تبدیلی واضح ہے اور اسے انتخابی مہموں کے ذریعے محسوس کیا جا سکتا ہے۔
انہوں نے کہا، “پہلے خوف ہماری طرف تھا، یعنی جو بھی انتخابات میں حصہ لے رہا تھا، امیدوار بن رہا تھا، ووٹ دے رہا تھا یا پریذائیڈنگ افسر یا پولنگ عملے کا کردار ادا کر رہا تھا، وہ خوفزدہ ہوتا تھا، نروس ہوتا تھا، اسے شرمندگی محسوس ہوتی تھی، اور وہ خود کو غلط سمجھتا تھا۔ یہ سب کچھ بدل چکا ہے”۔
انہوں نے مزید کہا کہ یہ تبدیلی لوگوں کے حوصلے، حکومت کی کوششوں، قانون نافذ کرنے والے اداروں اور میڈیا کے کردار کے سبب آئی ہے، جس نے حالات کی حقیقی رپورٹنگ کی ہے۔
سوین نے کہا، “اب بلاخوف سے انتخابات ہو رہے ہیں، جس میں لوگ انتخابی مہم چلا رہے ہیں، گھر گھر جا کر مہمیں ہو رہی ہیں، ریلیاں منعقد کی جا رہی ہیں۔ اسے ناپنا مشکل ہے، لیکن یہ واضح اور محسوس کی جا سکتی ہے۔ یہ شاید اس سال کے انتخابات کی سب سے خاص بات ہے”۔
جب اُن سے پوچھا گیا کہ کیا دہشت گردوں کی حملہ کرنے کی صلاحیت کو کمزور کر دیا گیا ہے، تو انہوں نے کہا کہ “کسی پاگل شخص کے لیے جو ہتھیار رکھتا ہو، نرم ہدف پر حملہ کرنا ناممکن نہیں ہے”۔
انہوں نے کہا، “دہشت گردوں اور ان کے نیٹ ورکس کی صلاحیت کو یقینی طور پر کمزور کیا گیا ہے، لیکن اگر کوئی پاگل شخص ہتھیار لے کر نرم ہدف پر حملہ کرنے کا فیصلہ کرے، تو یہ ناممکن نہیں ہے”۔