پامپور میں 3 منشیات فروش گرفتار، ممنوعہ مواد بر آمد: پولیس

پامپور// منشیات کے خلاف جنگ کو وسیع پیمانے پر جاری رکھتے ہوئے پولیس نے جنوبی کشمیر میں اونتی پورہ کے پامپور علاقے میں 3 منشیات فروشوں کو گرفتار کرکے ان کی تحویل سے ممنوعہ مواد بر آمد کیا ہے۔
پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن پامپور کی ایک پارٹی نے گالندر کراسنگ پر گاڑیوں کی چکنگ کے دوران ایک سکوٹی زیر رجسٹریشن نمبر JK13E–7562 کو روکا جس پر تین افراد سوار تھے۔
انہوں نے کہا کہ تلاشی کے دوران ان کی تحویل سے 8.160 کلو پپسا ہوا پوست کا بھوسا بر آمد کیا گیا۔
بیان میں کہا گیا کہ تینوں کو موقع پر ہی گرفتار کیا گیا اور جرم کے لئے استعمال کی جانی والی سکوٹی کو بھی ضبط کیا گیا۔
گرفتار شدگان کی شناخت اویس گل ولد غلام محمد بٹ ساکن درنگہ بل پامپور، طارق احمد شیخ ولد غلام قادر ساکن تولہ باغ پامپور اور مشتاق احمد میر ولد عبد الخالق میر ساکن نمبلہ بل پامپور کے طور پر کی گئی ہے۔
پولیس نے اس ضمن میں پولیس اسٹیشن پامپور میں این ڈی پی ایس ایکٹ کے متعلقہ دفعات کے تحت ایک کیس درج کرکے تحقیقات شروع کی ہیں۔