अध्यात्म हे व्यक्ती, कुटुंब अन् समाजाच्या प्रगतीचे माध्यम:पूज्य श्री प्रवीण ऋषीजी म. सा. यांचा हितोपदेश, दीड किलोमिटर शोभायात्रा काढून केले स्वागत

आज काही टीव्ही सिरीयल्समुळे आपल्या देशातील कुटुंबव्यवस्था ढासळत आहे, त्यात बदल होत आहे. काही बदल समाजाच्या प्रगतीसाठी असतात, तर काही बदल अधोगतीकडे नेतात. नैसर्गिक परिस्थितीमुळे जे बदलतात ते प्राणी असतात. मजबुरीने जे बदलतात ते कोणाचे गुलाम असतात! पण जे बळकटपणे बदलतात ते खरी माणसे असतात. म्हणूनच स्वतः विचार करा, चिंतन करा- तुम्ही प्राणी आहात, गुलाम आहात की माणूस? फक्त अध्यात्म आणि धर्मातच ती शक्ती आहे, जी व्यक्ती, कुटुंब आणि समाजाच्या प्रगतीचे माध्यम बनू शकते. त्यामुळे कुटुंब आणि समाजाच्या सुरक्षिततेसाठी आणि संघटनेसाठी आपल्या नैतिक जबाबदारीबद्दल जागरूक राहा, असा हितोपदेश अर्हम विज्जा प्रणेता पूज्य श्री प्रवीणऋषीजी म. सा. यांनी दिला. श्री श्रावक संघ सिल्लोड यांच्या अध्यक्षतेखाली आयोजित जीवन परिवर्तन मालाच्या पहिल्या दिवशी विशाल धर्मसभेला संबोधित करताना ते बोलत होते. प्रथम सकल राजस्थानी समाजाचे अध्यक्ष विनोद मंडलेचा यांच्या निवासस्थानापासून जैन स्थानकापर्यंत दीड किलोमीटरची शोभायात्रा काढण्यात आली. गुरुभक्तीचे गीत आणि जयघोषासह उपाध्याय प्रवर परमपूज्य श्री प्रवीणऋषीजी म. सा., मधुर गायक पूज्य श्री तीर्थऋषीजी म. सा. आदिठाणा २ यांचे शहरात आगमन झाले. गुरुदेवांच्या स्वागतासाठी काढलेल्या शोभायात्रेत कार्यक्रमांचे सादरीकरण तसेच महावीर चौक येथे युवक मंडळ, पाठशाळेतील मुलं आणि वारकरी शिक्षण संस्थेच्या विद्यार्थ्यांनी अप्रतिम सादरीकरण केले. सिल्लोड- सोयगाव मतदारसंघाचे आमदार अब्दुल सत्तार हे शोभायात्रेत सहभागी झाले होते. विनोद मंडलेचा, धरमचंद मंडलेचा, अनिल लोहाडे, सुभाष जैन, नंदकिशोर सहारे आदी होते. बुधवारपर्यंत विशेष प्रवचनमाला ५ फेब्रुवारीपर्यंत व्यक्ती, कुटुंब, समाज आणि अध्यात्म या विषयांवर विशेष प्रवचनमालेचे आयोजन जैन स्थानकमध्ये होणार असून याचा लाभ सर्व शहरवासीयांनी घ्यावा, असे आवाहन श्रावक संघकडून करण्यात आले आहे. पूज्य गुरुदेवांच्या आगमनाने आणि विशेष जीवन परिवर्तन प्रवचनमालेने संपूर्ण संघात, युवक मंडळ आणि महिला मंडळात मोठा उत्साह दिसून आला. पूज्य गुरुदेवांच्या अपार ज्ञानाचा उपयोग स्वतःसाठी करण्याचा संकल्प सर्वांनी केला.