आचार्य विद्यासागर महाराजांच्या नावे 100 रुपयांच्या विशेष नाण्याची घोषणा:नाण्यामध्ये 50 टक्के चांदी अन् उर्वरित इतर धातूंचे मिश्रण असल्याची माहिती

केंद्र सरकारने आचार्य विद्यासागर महाराज यांच्या प्रथम समाधी दिनानिमित्त १०० रुपयांच्या विशेष नाण्याची घोषणा केली आहे. वित्त मंत्रालयाच्या वतीने काढण्यात येणाऱ्या या नाण्यात ५० टक्के चांदी तर ४० टक्के तांबे, ५ टक्के निकेल आणि जस्ताचा समावेश असणार आहे. या नाण्यावर आचार्य विद्यासागर महाराज यांचे चित्र असेल. जैन समाजाच्या वतीने या घोषणेबद्दल आनंद व्यक्त होत आहे. या नाण्याला २०० कंगोरे असतील. त्याचा परीघ ४४ मिलिमीटर असणार आहे. पहिल्यांदाच काढण्यात येणारे हे नाणे जैन समाजासाठी सरकारची विशेष भेट आहे. आचार्य विद्यासागर महाराज यांनी आपल्या विचारांनी आणि कार्याने भारताच्या आध्यात्मिक परंपरेला जागतिक स्तरावर उंचावले आहे. छत्तीसगड येथील चंद्रगिरी तीर्थस्थळावर आचार्य श्री विद्यासागर महाराज यांचा प्रथम समाधी स्मृती महोत्सव आणि श्री १००८ सिद्धचक्र िवधान विश्व शांती महायज्ञात गुरुवारी केंद्रीय गृहमंत्री अमित शाह आणि मुख्यमंत्री विष्णुदेव साय सहभागी झाले होते. या वेळी शाह यांनी नियोजित समाधी स्मारक विद्यायतनचे भूमिपूजन केले. तसेच आचार्य विद्यासागर यांच्या स्मृतिप्रीत्यर्थ १०० रुपयांचे स्मारक नाणे ,डाक विभागाचा ५ रुपयांचा विशेष लिफाफा,१०८ चरणचिन्ह व चित्राचे लोकार्पण या वेळी करण्यात आले.