आनंद मेळावा:उपक्रमातून विद्यार्थ्यांना व्यवहाराचे ज्ञान, खमंग ढोकळा प्रथम, हैदराबादी चिकन बिर्याणी द्वितीय

सटाणा येथील लोकनेते पंडितराव धर्माजी पाटील मराठा इंग्लिश स्कूलमध्ये आयोजित भारत स्काऊट गाईडच्या आनंद मेळाव्यात विद्यार्थ्यांनी भाजीपाला, फळे व विविध खाद्य पदार्थांचे ४९४ स्टॉल लावले होते. यात धीरज शिवदेचा खमंग ढोकळा प्रथम, गौरव शिंदेची हैदराबादी चिकन बिर्याणी द्वितीय तर श्रेयस पाटीलने बनवलेल्या चंपाकळीला तृतीय तर मल्हार भधानने बनवलेल्या अनारशाने उत्तेजनार्थ बक्षीस मिळवले. आनंद मेळाव्यात विद्यार्थ्यांनी स्काऊट गाईड खरी कमाई अंतर्गत २०० भाजीपाला, २४९ खाद्यपदार्थाचे तर ४५ स्टेशनरी व खेळण्याची दुकाने थाटली होती. यावेळी आलेल्या प्रमुख पाहुण्यांसह विद्यार्थी, पालक, शिक्षक व विद्यार्थ्यांनी आनंद मेळाव्यात विविध वस्तू व खाद्यपदार्थाची खरेदी केली. कार्यक्रमास द्वारकाधीश साखर कारखान्याचे अध्यक्ष शंकरराव सावंत, मविप्रचे चिटणीस दिलीप दळवी, संचालक डॉ. प्रसाद सोनवणे, संचालिका शालन सोनवणे या पाहुण्यांच्या हस्ते महात्मा गांधी, बेडन पॉवेल यांच्या प्रतिमेचे पूजन व स्काऊटच्या तंबूचे उद्घाटन करण्यात आले. प्रास्ताविक मुख्याध्यापक विनायक बच्छाव यांनी केले. यावेळी उपमुख्याध्यापक सुभाष पाटील, पर्यवेक्षिका जे. बी. देवरे, विद्यालयातील सर्व शिक्षक शिक्षकेतर कर्मचारी उपस्थित होते. सूत्रसंचालन शेखर दळवी यांनी केले. या उपक्रमाच्या माध्यमातून विद्यार्थ्यांना आर्थिक व्वहाराचे ज्ञान मिळाले. स्काऊट गाईड आनंद मेळाव्यात स्टाँलची पाहणी करताना दिलीप दळवी, शालन सोनवणे,मुख्याध्यापक विनायक बच्छाव अरुण सोनवणे . भारत स्काऊट गाईड अंतर्गत आनंद मेळाव्यामुळे विद्यार्थ्यांना खरेदी-विक्री, नफा-तोटा या व्यवहाराचे ज्ञान व अनुभव मिळतो. त्यामुळे विद्यार्थ्यांना प्रोत्साहन मिळते. या अनुभवातूनच मुले पुढे जाऊन लहान मोठा उद्योग किंवा व्यावसायिक होतात. -विनायक बच्छाव, मुख्याध्यापक