आसामच्या व्लॉगर तरुणीचा मित्राने केला घात, संशयित दोन दिवस राहिला मृतदेहासोबत!

बंगळुरूमधून एक धक्कादायक घटना उघडकीस आली आहे. माया गोगोई नामक व्लॉगर तरुणीचा इंदिरा नगर परिसरात असलेल्या सर्व्हिस अपार्टमेंटमध्ये खून करण्यात आला आहे. धक्कादायक बाब म्हणजे आरोपी दोन दिवस मृतदेहासोबत राहिल्याचा संशय पोलिसांना आहे. याप्रकरणी पोलिसांनी गुन्हा दाखल केला आहे.

मिळालेल्या माहितीनुसार, 23 नोव्हेंबर रोजी आरव हरणी आणि पीडित तरूणी इंदिरा नगर सोसायटीमधील सर्व्हिस अपार्टमेंटमध्ये आले होते. त्याच्याच दुसऱ्या दिवशी म्हणजे 24 नोव्हेंबरला पीडित तरूणीचा खून करण्यात आला. पीडित तरुणीला चाकूने अनेक वेळा भोसकण्यात आले आहे. या हल्ल्यात तिचा जागीच मृत्यू झाला. त्यानंतर दोन दिवस आरोपी मृतदेहासोबत होता, असा पोलिसांना संशय आहे. त्यानंतर तो फरार झाला आहे. माया गोगोई ही मुळ आसामची असून ती एक व्लॉगर आहे. तसेच आरोपी आरव हा केरळचा रहिवाशी आहे. ते दोघ मित्र असल्याची प्राथमिक माहिती समोर आली आहे. पोलिसांनी याप्रकरणी गुन्हा दाखल करत आरोपीचा शोध सुरू केला आहे. India Today या इंग्रजी वृत्तवाहिनीने यासंदर्भात वृत्त दिले आहे.