एकलव्य, एस्पायरला अजिंक्यपद; सामना माध्यम प्रायोजक

हिंदुहृदयसम्राट शिवसेनाप्रमुख बाळासाहेब ठाकरे यांच्या जयंतीनिमित्त आयोजित रस्सीखेच स्पर्धेत पुरुष व्यावसायिक गटात एकलव्य संघाने शौर्य स्पोर्ट्सवर मात करत अजिंक्यपद पटकावले तर महिलांच्या गटात एस्पायर संघाने बाजी मारली. ग्रामस्थ आणि क्रीडा मंडळाच्या गटात किणे ग्रामस्थ मंडळाने येमकोंड ग्रामस्थ मंडळाचा पराभव करत जेतेपद काबीज केले. या स्पर्धेला दैनिक ‘सामना’ माध्यम प्रायोजक होते.

वरळी विधानसभेचे उपविभागप्रमुख राम साळगावकर यांनी आयोजित केलेल्या राज्यस्तरीय रस्सीखेच स्पर्धेला मुंबईसह ठाणे, नवी मुंबई, रायगड, पालघर, पुणे, सातारा, सांगली, कोल्हापूर, छत्रपती संभाजीनगर, जालना अशा विविध जिह्यांतून हजारो स्पर्धकांनी उत्स्फूर्तपणे भाग घेतला होता. या अभूतपूर्व स्पर्धेचे उद्घाटन शिवसेना नेते, युवासेना प्रमुख आणि आमदार आदित्य ठाकरे यांनी स्वतः मैदानात उतरून खेळाडूंसोबत रस्सीखेच करत केले.

याप्रसंगी शिवसेना उपनेते, भारतीय कामगार सेनेचे सरचिटणीस व आमदार सचिन अहिर, आमदार सुनील शिंदे, माजी महापौर किशोरी पेडणेकर, विभागप्रमुख आशीष चेंबूरकर उपस्थित होते.