करकंबने ७०० वृक्ष लावून केलेले संवर्धन, हे सर्वांसाठी अनुकरणीय, गादेगावमध्ये श्रमसंस्कार शिबिराप्रसंगी ज्ञानेश्वर दुधाणे यांचे प्रतिपादन‎

आता उन्हाळा सुरू होण्याची चाहूल लागली आहे. त्यामुळे येणारा काळात उन्हाळा सर्वांना सुखकर होण्यासाठी वृक्षलागवड व संवर्धन होणे अत्यावश्यक असल्याचे मत ज्ञानेश्वर दुधाणे यांनी व्यक्त केले. उमा महाविद्यालय पंढरपूर आणि पुण्यश्लोक अहिल्यादेवी होळकर विद्यापीठ यांच्या विद्यमाने गादेगाव (ता. पंढरपूर) येथे आयोजित सात दिवशीय विशेष श्रमसंस्कार शिबिरात प्रमुख वक्ते म्हणून ते बोलत होते. यावेळी ज्ञानेश्वर दुधाणे यांनी हे मत व्यक्त केले. तरुण युवक, युवतीवर सामाजिक बांधिलकीचे संस्कार रुजावेत आणि समाजिक काम करत असताना कोण कोणत्या अडचणी येतात यावर सात दिवस हे विशेष श्रमसंस्कार शिबिर आयोजित केले आहे. सुरुवातीला मा. उपसरपंच गणपत मोरे, वक्ते ज्ञानेश्वर दुधाणे, अविनाश देशपांडे यांच्या हस्ते क्रांतिज्योती सावित्रीबाई फुले यांच्या प्रतिमेचे पूजन करून कार्यक्रमाला सुरुवात झाली. या वेळी उमा महाविद्यालय पंढरपूर येथील विद्यार्थी- विद्यार्थिनी तसेच गादेगावमधील अनेक ग्रामस्थ उपस्थित होते. सूत्रसंचालन विद्यार्थिनी नंदिनी कदम हिने केले. या शिबिराचा समारोप सोमवारी ३ रोजी सकाळी १० वाजता होणार आहे. शिबिरात सहभाग घेण्याचे आवाहन केले आहे. या वेळी ज्ञानेश्वर दुधाणे यांनी सांगितले की, वृक्षाची पूजा म्हणजेच निसर्ग पूजा हीच खरी पूजा होय. कारण वृक्ष सर्वांना समान वागणूक देत आपले सर्वस्व अर्पण करतात हा गुण आपण झाडाकडून घेतला पाहिजे. झाडे लावली पाहिजेत व ती जगवली पाहिजेत. याच माध्यमातून करकंब गावच्या लेकीचं झाड अभियान टीमच्या माध्यमातून वृक्ष लागवड करत तीन वर्षे सर्व प्रवेशद्वारावर जवळपास ७०० मोठ्या झाडांची लागवड करून यशस्वी वृक्षारोपण करण्यात आले आहे. सर्व ग्रामपंचायत पदाधिकारी यांनी प्रत्येक गावागावात वृक्षारोपण केले पाहिजे. सोलापूर जिल्ह्याचे तापमान ४५ पर्यंत गेल्याने परिस्थिती गंभीर बनत आहे